پاکستان کے معروف گلوکار علی ظفر نے سیلاب متاثرین کیلئے فنڈ ریزنگ کیلئے کنسرٹ کرنے کا اعلان کر دیاہے، جس سے حاصل ہونے والی رقم متاثرہ افراد کی بحالی کیلئے لگائی جائے گی ۔
تفصیلات کے مطابق کنسرٹ 27 ستمبر 2025 کو لاہور الحمرا کلچرل کمپلیکس میں منعقد کیا جائے گا، فنڈ ریزنگ کنسرٹ میں علی ظفر کی پرفارمنس کے ساتھ ساتھ دیگر معروف فنکاروں کی سرپرائز شمولیت بھی متوقع ہے، جن کے ناموں کا اعلان بعد میں کیا جائے گا۔
کنسرٹ سے حاصل ہونے والی تمام آمدنی علی ظفر فاؤنڈیشن کے ذریعے متاثرہ خاندانوں کی بحالی اور امداد پر خرچ کی جائے گی، جنہوں نے اس آفت میں اپنے گھر اور روزگار کھو دیے ہیں۔
کنسرٹ کی ٹکٹس کی فروخت کا آغاز ہو چکا ہے۔
علی ظفر نے اپنے پیغام میں کہا کہ کنسرٹ صرف موسیقی نہیں بلکہ ایک آواز ہے ، آئیں ہم سب مل کر اُن لوگوں کے لیے اُمید کا چراغ بنیں جو آج بھی مدد کے منتظر ہیں، آئیں ان کے ساتھ کھڑے ہوں جنہیں ہماری سب سے زیادہ ضرورت ہے، یہ ایونٹ نہ صرف موسیقی بلکہ پاکستان کی انسان دوست برادری کے لیے بھی ایک اہم موقع ہے، جہاں فن اور احساس یکجا ہو کر حقیقی تبدیلی لا سکتے ہیں۔
فنڈ ریزنگ کنسرٹ کی ٹکٹس "ٹکٹ والا" ویب سائٹس سے لی جاسکتی ہیں۔
