عالمی منڈی میں خام تیل کے نرخوں میں اضافے کا رجحان رہا جس کی وجہ اوپیک پلس کا توقع سے کم پیداوار بڑھانے کا فیصلہ اور روس پر ممکنہ نئی پابندیوں کے خدشات ہیں۔
منگل کو عالمی منڈی میں کاروباری سرگرمیوں کے دوران برینٹ کروڈ آئل 35 سینٹ یا 0.53 فیصد بڑھ کر 66.37 ڈالر فی بیرل ہو گیا جبکہ امریکی ویسٹ ٹیکساس انٹرمیڈیٹ 32 سینٹ یا 0.51 فیصد اضافے سے 62.58 ڈالر فی بیرل پر پہنچ گیا۔
خبرایجنسی کے مطابق اوپیک اور اس کے اتحادی ممالک اوپیک پلس کے 8 رکن ممالک نے اتوار کو اعلان کیا کہ اکتوبر سے پیداوار میں 137,000 بیرل یومیہ اضافہ کیا جائے گا۔ یہ اضافہ ستمبر اور اگست کے ماہانہ اضافے ، جولائی و جون کے اعداد وشمار اور ماہرین کی توقعات سے بھی کم ہے۔
اس سال اوپیک پلس کی تیز پیداواری رفتار اور عالمی طلب کے اندازوں سے کم رہنے کے باعث منڈی میں خام تیل کی اضافی رسد بنیادی عنصر بنی ہوئی ہے جو قیمتوں پر دباؤ ڈالتی ہے۔
ادھر روس کے سب سے بڑے فضائی حملے میں یوکرین کے دارالحکومت کیف کی ایک سرکاری عمارت کو آگ لگنے کے بعد ماسکو پر مزید پابندیوں کے امکانات بھی قیمتوں میں اضافے کا باعث بنے۔
