سیلابی صورتحال کے باعث ملک میں مہنگائی بڑھنے لگی، گزشتہ ہفتے اٹھارہ اشیائے ضروریہ کی قیمتیں بڑھیں، ہفتہ وار شرح 0.62 فیصد اضافے کے ساتھ 3.57 فیصد تک جا پہنچی۔
رپورٹ کے مطابق گزشتہ ہفتے ٹماٹر، گندم کا آٹا، زندہ برائلر چکن، آلو اور انڈوں کی قیمتوں میں نمایاں اضافہ ریکارڈ کیا گیا۔ بیس کلو آٹے کا تھیلا 198 روپے مہنگا ہو کر اوسطاً 1829 روپے میں فروخت ہوتا رہا۔ ٹماٹر 18 روپے فی کلو اضافے کے ساتھ 140 روپے سے تجاوز کر گئے ۔ زندہ برائلر مرغی کی قمیت 15 روپے فی کلو بڑھی، اوسط قیمت 470 روپے ریکارڈ کی گئی ۔ چینی کی فی کلو قیمت بھی 25 پیسے بڑھ کر اوسطاً 181.59روپے رہی۔ بیف، لہسن، ایل پی جی، کپڑوں اور لکڑی کی قیمتوں میں بھی اضافہ دیکھا گیا۔ رپورٹ کے مطابق گزشتہ ہفتے چھ اشیائے ضروریہ سستی ہوئیں ۔ دال ماش، دال مسور، دال چنا، کیلا، گھی اور پیاز شامل ہیں ۔ جبکہ 27 اشیا کی قیمتوں میں استحکام رہا۔
