پاکستان کرکٹ بورڈ نے کھلاڑیوں کے نئے سینٹرل کنٹریکٹس کا اعلان کردیا، اے کیٹیگری میں کوئی کھلاڑی شامل نہیں، بابر اعظم اور محمد رضوان تنزلی کے بعد بی کیٹیگری میں شامل ہیں، پرفارمنس کی بنیاد پر کیٹیگری بی، سی اور ڈی میں 10، 10 کھلاڑی رکھے گئے ہیں۔
پاکستان کرکٹ بورڈ نے قومی کرکٹرز کے سینٹرل کنٹریکٹس کا اعلان کردیا، اے کیٹیگری میں کوئی کھلاڑی پرفارمنس کے باعث جگہ نہیں بناسکا، بی، سی اور ڈی کیٹیگری میں مجموعی طور پر 30 کرکٹرز شامل ہیں۔
پی سی بی کے مطابق بابر اعظم اور محمد رضوان تنزلی کے بعد اے کیٹگری سے بی کیٹگری میں چلے گئے، دیگر کھلاڑیوں میں شاہین آفریدی، فخر زمان، شاداب خان، ابرار احمد، حارث رؤف، حسن علی، صائم ایوب، سلمان علی آغا بھی بی کیٹیگری کا حصہ ہیں۔
پی سی بی اعلامیے کے مطابق پرفارمنس کی بنیاد پر کیٹیگری بی، سی اور ڈی میں 10، 10 کھلاڑی رکھے گئے، کنٹریکٹس یکم جولائی 2025 سے 30 جون 2026ء تک لاگو ہوں گے۔
پی سی بی سینٹرل کنٹریکٹ کی سی کیٹیگری میں عبداللہ شفیق، حسن نواز، فہیم اشرف، محمد حارث، محمد نواز، نسیم شاہ، نعمان علی، صاحبزادہ فرحان، ساجد خان اور سعود شکیل شامل ہیں۔
سینٹرل کنٹریکٹ کی ڈی کیٹیگری میں احمد دانیال، حسین طلعت، خرم شہزاد، خوشدل شاہ، محمد عباس، عباس آفریدی، محمد وسیم جونیئر، سلمان مرزا، شان مسعود، سفیان مقیم کو رکھا گیا ہے۔
رپورٹ کے مطابق پی سی بی نے بی کیٹیگری کے معاوضوں میں کوئی اضافہ نہیں کیا، بی کیٹیگری کے تمام 10 کھلاڑی کنٹرکٹ کے مطابق ماہانہ 45 لاکھ کمائیں گے۔
ذرائع کے مطابق کرکٹرز کے سی اور ڈی کیٹیگری کے کنٹرکٹس کے معاوضوں میں 2 سے 4 لاکھ روپے کا اضافہ کردیا گیا، اس سے قبل سی کیٹیگری کے کھلاڑی 20 لاکھ اور ڈی کیٹیگری کے کھلاڑی 12 لاکھ کما رہے تھے۔
