جارجیا میں امریکی فوجی اڈے فورٹ اسٹیورٹ میں فائرنگ کے واقعے کے نتیجے میں متعدد افراد کے ہلاک ہونے کی اطلاع ہے۔ فوجی اڈے کو لاک ڈاؤن کر دیا گیا ہے۔
فورٹ اسٹیورٹ کی جانب سے جاری کردہ بیان میں کہا گیا ہے کہ انسٹالیشن کو صبح 11 بج کر 4 منٹ پر لاک ڈاؤن کیا گیا اور قانون نافذ کرنے والے ادارے موقع پر موجود ہیں۔ واقعہ سیکنڈ آرمرڈ بریگیڈ کومبیٹ ٹیم کے علاقے میں پیش آیا۔
امریکی حکام نے ہلاکتوں کی تصدیق کی ہے تاہم زخمیوں یا جاں بحق افراد کی تعداد اور نوعیت کے بارے میں کوئی معلومات فوری طور پر دستیاب نہیں ہو سکیں۔
لبرٹی کاؤنٹی شیرف آفس کے ترجمان کے مطابق ان کا ادارہ فورٹ اسٹیورٹ میں پیش آنے والے واقعے کے بعد کارروائی میں مدد کر رہا ہے تاہم مزید تفصیلات کے لیے امریکی فوج سے رابطہ کیا جائے۔
جارجیا کے گورنر برائن کیمپ نے ایکس پر اپنے بیان میں کہا کہ وہ اور ان کا خاندان فورٹ اسٹیورٹ میں آج پیش آنے والے واقعے پر افسردہ ہیں۔ہم متاثرین ان کے اہل خانہ اور تمام اہلکاروں کے لیے دعاگو ہیں اور تمام جارجیائی عوام سے بھی یہی گزارش ہے۔
فورٹ اسٹیورٹ اٹلانٹا سے تقریباً 225 میل (362 کلومیٹر) جنوب مشرق میں اور ساوانا سے تقریباً 40 میل (64 کلومیٹر) جنوب مغرب میں واقع ہے۔
