وزیراعظم شہبازشریف نے کمانڈ اینڈ اسٹاف کالج میں خطاب کرتے ہوئے کہا کہ بہادر بیٹوں اور بیٹیوں کے درمیان موجودگی باعث اعزاز ہے،ہمیں اپنے محافظوں پر فخر ہے،جوہماری خودمختاری کے نگہبان ہیں۔
وزیراعظم نے کہا کہ کمانڈ اینڈ اسٹاف کالج کوئٹہ پیشہ ورانہ تربیت کی درخشاں روایات کا امین ہے،دوست ممالک سے آئے مہمان افسران کو خوش آمدید کہتا ہوں،ایک سال پہلے بھارت نے پاکستان پر جارحیت مسلط کی،دشمن نے خود کو ہم سے زیادہ طاقتور سمجھنے کی غلطی کی،پاکستان نے بھارت کو مذاکرات کی مخلصانہ پیشکش کی، مثبت جواب دینے کے بجائے دشمن نے جارحیت کاراستہ اختیارکیا۔
شہبازشریف نے کہا کہ پاکستان کی فضائی برتری اور میزائلوں کی صلاحیت نے دشمن کو سبق سکھایا،ہم نے دشمن کو وہ سبق سکھایا،جسےوہ کبھی فراموش نہیں کر سکے گا،سفارتی محاذ پر بھی پاکستان کے سچ پر مبنی مؤقف کو پذیرائی ملی، عالمی سطح پر دشمن کے الزامات مکمل طور پر بے نقاب ہو گئے، ہم نے ثابت کیا کہ امن کی خواہش کمزوری نہیں،ہماری طاقت تھی۔
انہوں نے کہا کہ فیلڈمارشل نے جرات،ذمہ دار قیادت اور پیشہ ورانہ مہارت کا مظاہرہ کیا،فیلڈ مارشل کی قیادت نے دفاع وطن کے قومی یقین کو مزید مضبوط کیا،دہشتگردی کے خلاف جنگ بھرپور طریقے سے جاری ہے،پاک سرزمین سے دہشتگردی ہمیشہ کیلئے ختم کر کے دم لیں گے۔
