میٹا اپنی سوشل میڈیا ایپس کو مزید مربوط کرنے کے لیے واٹس ایپ میں ایک دلچسپ نیا فیچر متعارف کروا رہا ہے۔
WABetaInfo کی رپورٹ کے مطابق واٹس ایپ ایک نئے فیچر پر کام کر رہا ہے جس کے ذریعے صارفین اپنی انسٹاگرام یا فیس بک پروفائل فوٹو کو واٹس ایپ پر براہ راست امپورٹ کرکے اپنی پروفائل تصویر کے طور پر سیٹ کر سکیں گے۔
یہ فیچر فی الحال اینڈرائیڈ ڈیوائسز کے لیے واٹس ایپ کے بیٹا ورژن میں محدود صارفین کے لیے دستیاب ہے اور اسے استعمال کرنا انتہائی آسان ہے۔
صارفین کو بس واٹس ایپ کی پروفائل سیٹنگز میں جا کر "پروفائل پکچر ایڈٹ" پر کلک کرنا ہوگا جہاں انہیں انسٹاگرام اور فیس بک کے آپشنز نظر آئیں گے (اگر یہ فیچر ان کے لیے فعال ہو)۔
اس وقت واٹس ایپ صارفین اپنی پروفائل فوٹو فون گیلری سے تصویر منتخب کرکے، ڈیجیٹل اواتار بناکر یا اے آئی سے تیار کردہ تصویر استعمال کرکے تبدیل کر سکتے ہیں۔
لیکن یہ نیا فیچر انہیں میٹا کی دیگر ایپس سے پروفائل فوٹو درآمد کرنے کی سہولت دے گا۔
رپورٹ کے مطابق یہ فیچر اختیاری ہے اور بطور ڈیفالٹ بند رہے گا۔
اسے استعمال کرنے کے لیے صارفین کو اپنا واٹس ایپ اکاؤنٹ میٹا اکاؤنٹ سینٹر سے منسلک کرنا ہوگا تاہم، اس سے صارفین کی رازداری پر کوئی اثر نہیں پڑے گا۔
چونکہ یہ فیچر ابھی بیٹا مرحلے میں ہے اس لیے یہ واضح نہیں کہ یہ کب تک تمام صارفین کے لیے عام دستیاب ہوگا۔
توقع ہے کہ جلد ہی یہ سہولت واٹس ایپ کے تمام صارفین کے لیے پیش کی جائے گی جو میٹا کی ایپس کے درمیان رابطے کو مزید بہتر بنائے گی۔
