بھارتی ریاست اتراکھنڈ کے شہر ہریدوار کے مندر میں بھگدڑ مچنے سے 6 افراد ہلاک اور متعدد زخمی ہوگئے، کئی کی حالت تشویشناک ہے۔
بھارتی میڈیا رپورٹس کے مطابق ہریدوار میں منسا دیوی کے مندر میں بھگدڑ مچنے کا واقعہ پیش آیا، حادثے میں 6 افراد ہلاک اور متعدد زخمی ہوگئے، زخمیوں کو اسپتال منتقل کردیا گیا۔
رپورٹ کے مطابق اتر کھنڈ پولیس اور ریسکیو ٹیمیں فلاحی کاموں میں مصروف ہیں اور 35 افراد کو طبی امداد کیلئے اسپتال منتقل کیا گیا ہے۔
بھارتی میڈیا کے مطابق ایک عینی شاہد نے بتایا کہ اچانک بڑی تعداد میں زائرین مندر میں جمع ہوگئے تھے، جب کچھ لوگوں نے رش سے باہر نکلنے کی کوشش کی تو بھگدڑ مچ گئی۔
انہوں نے کہا کہ کچھ لوگوں کے گرنے کی وجہ سے میرے ہاتھ میں بھی فریکچر ہوگیا۔
بھارت میں مذہبی تہواروں کے دوران بھگدڑ اور بد انتظامی معمول ہے۔ رواں سال جنوری میں کمبھ میلے میں بھگدڑ مچنے سے 30 افراد ہلاک ہوئے تھے۔
