ملک بھر میں مون سون بارشوں اور سیلاب کی تباہ کاریوں کا سلسلہ جاری ہے اور گزشتہ چوبیس گھنٹے کے دوران مزید 14 افراد مختلف حادثات میں جاں بحق ہوگئے ۔
این ڈی ایم اے کے جاری اعداد وشمار کے مطابق سب سےزیادہ 5 ہلاکتیں پنجاب ، 3 گلگت بلتستان اور 2 ہلاکتیں اسلام آباد میں ہوئیں ، ملک بھر میں بارشوں اور سیلاب سے مختلف واقعات میں 17 لوگ زخمی ہوئے ہیں۔
این ڈی ایم اے کے مطابق رواں مون سون میں اب تک 266 افراد جاں بحق اور 628 زخمی ہوچکے ہیں ۔ اس دوران اٹھارہ کلومیٹر سڑک،بارہ پلوں کونقصان پہنچا اور 366 مویشی بھی جان سے گئے ۔
وزیراعظم شہبازشریف نے گلگت بلتستان میں سیلاب میں پھنسے افراد کو نکالنے کے لیے ریسکیو آپریشن مزید تیز کرنے کا حکم دیدیا۔ شاہراہ قراقرم اور ناران، بابوسر، چلاس شاہراہ کی بحالی کی ہدایت کردی۔ کہا آنے والے مون سون اسپیلز کیلئے این ڈی ایم اے اور دیگر ادارے مشترکہ لائحہ عمل بنائیں۔ پھنسے ہوئے سیاحوں کو رہائش اور خوراک سمیت ہر ممکن سہولت فراہم کی جائے۔
وزیراعظم نے کہا سیلاب سے متاثرہ علاقوں میں وبائی امراض کی روک تھام کیلئے اقدامات انتہائی ضروری ہیں ۔ سی ون تھرٹی طیارہ آج علاقے میں پھنسے سیاحوں کو اسلام آباد لائے گا۔
