بابوسر ٹاپ کے گرد و نواح میں کلاؤڈ برسٹ کے باعث 7 سے 8 کلومیٹر کے علاقے میں شدید لینڈ سلائیڈنگ اور فلیش فلڈنگ کے نتیجے میں 14 سے 15 مقامات پر بڑے پیمانے پر راستے بند ہو گئے ہیں۔
ترجمان این ڈی ایم اے کے مطابق مختلف مقامات پر پھنسے ہوئے سیاحوں کو چلاس سمیت محفوظ مقامات پر منتقل کر دیا گیا ہے۔ سیلابی ریلے میں 3 افراد کی لاشیں نکال لی گئی ہیں جبکہ ایک زخمی کو طبی امداد کے لیے آر ایچ کیو اسپتال منتقل کیا گیا ہے۔
ترجمان کا کہنا ہے کہ پھنسی ہوئی گاڑیوں کو ملبے سے نکالنے کا کام جاری ہے اور این ڈی ایم اے روڈ کی جلد بحالی کے لیے متعلقہ اداروں کے ساتھ مسلسل رابطے میں ہے۔
شاہراہ قراقرم لال پہاڑی اور تتھا پانی کے مقامات پر بند ہے جبکہ امدادی سرگرمیاں جاری ہیں اور حکام صورتحال پر گہری نظر رکھے ہوئے ہیں۔
این ڈی ایم اے نے عوام سے اپیل کی ہے کہ متاثرہ علاقوں میں غیر ضروری سفر سے گریز کریں ۔
