نور مقدم قتل کیس میں سزائے موت پانے والے مجرم ظاہر جعفر کی صدر مملکت کو رحم کی اپیل بھیجنے کے لیے اہم قانونی تقاضا پورا کر لیا گیا۔
اڈیالہ جیل راولپنڈی میں قید مجرم ظاہر جعفر کا طبی اور نفسیاتی معائنہ مکمل ہو گیا ہے اور پمز اسپتال کے دو رکنی میڈیکل بورڈ جس میں ماہر نفسیات ڈاکٹر شفقت نواز اور نیورولوجسٹ ڈاکٹر عامر نوید شامل تھے نے اڈیالہ جیل میں تقریباً تین گھنٹے تک ظاہر جعفر کا معائنہ کیا۔
یہ میڈیکل بورڈ سپرنٹنڈنٹ سینٹرل جیل راولپنڈی کے خط پر تشکیل دیا گیا تھا۔
میڈیکل بورڈ اپنی خفیہ رپورٹ جیل انتظامیہ کو ارسال کرے گا جو اسے ظاہر جعفر کی رحم کی اپیل کے ساتھ صدر مملکت کو بھجوائے گی۔
یہ رپورٹ صدر مملکت کے فیصلے میں اہم کردار ادا کر سکتی ہے۔
واضح رہے کہ ظاہر جعفر کی سزائے موت کے خلاف اپیل سپریم کورٹ پہلے ہی مسترد کر چکی ہے۔
