پنجاب ڈیزاسٹر مینجمنٹ اتھارٹی (پی ڈی ایم اے) نے صوبے کے مشرقی دریاؤں میں پانی کے اضافے اور ممکنہ سیلابی صورتحال کے پیش نظر الرٹ جاری کردیا۔
ترجمان پی ڈی ایم اے کے مطابق 21 جولائی سے دریاؤں میں سیلاب کا خطرہ ہے اور کمشنرز لاہور، ساہیوال، ملتان، گوجرانوالہ، بہاولپور اور فیصل آباد سمیت جہلم، راولپنڈی، اٹک، گجرات، سرگودھا، خوشاب، جھنگ اور دیگر متعلقہ اضلاع کے ڈپٹی کمشنرز کو ہائی الرٹ رہنے کی ہدایت کی گئی ہے۔
پی ڈی ایم اے نے ریسکیو 1122 کو پیشگی انتظامات مکمل کرنے کی ہدایات جاری کی ہیں جبکہ لوکل گورنمنٹ، محکمہ ایریگیشن اور دیگر متعلقہ اداروں کو بھی الرٹ کردیا گیا ہے۔
ڈی جی پی ڈی ایم اے عرفان کاٹھیا نے متعلقہ انتظامیہ کو ہدایت کی ہے کہ وزیراعلیٰ پنجاب کے احکامات کے مطابق تمام تر انتظامات پیشگی مکمل کیے جائیں۔
انہوں نے ایمرجنسی کنٹرول رومز اور ریسکیو 1122 کی ڈیزاسٹر رسپانس ٹیموں کو ہائی الرٹ رکھنے، پٹرول و ڈیزل کا وافر اسٹاک یقینی بنانے، اور عوام کو صورتحال سے باخبر رکھنے کی ہدایت کی۔
علاوہ ازیں، دریاؤں کے پاٹ میں موجود مکانات اور مویشیوں کے انخلا کو یقینی بنانے پر زور دیا گیا ہے۔
