پاکستان تحریک انصاف (پی ٹی آئی) کی سینئر رہنما ڈاکٹر یاسمین راشد کی طبیعت خراب ہونے کے باعث انہیں کوٹ لکھپت جیل سے لاہور کے سروسز اسپتال منتقل کر دیا گیا۔
وکیل رانا مدثر عمر کے مطابق ڈاکٹر یاسمین راشد کو سانس لینے میں شدید دشواری اور معدے کے ساتھ پیٹ میں درد کی شکایت تھی۔
وکیل نے بتایا کہ سروسز اسپتال میں ڈاکٹر یاسمین راشد کے مختلف طبی ٹیسٹ کیے گئے ہیں اور سانس کی تکلیف کے باعث انہیں آکسیجن بھی فراہم کی جا رہی ہے۔
ڈاکٹر یاسمین راشد گزشتہ ایک سال سے 9 مئی واقعات سے متعلق متعدد مقدمات میں کوٹ لکھپت جیل میں قید ہیں اور یہ دوسرا موقع ہے جب طبیعت خراب ہونے کے باعث انہیں اسپتال منتقل کیا گیا ہے۔
