ایف آئی اے اینٹی کرپشن اسلام آباد نے بڑی کارروائی کے دوران خلاف ضابطہ بھرتیوں کے کیس میں زراعت کے تحقیقاتی ادارے پی اے آر سی کے چیئرمین اور ڈائریکٹر اسٹیبلشمنٹ کو گرفتار کرلیا، ملزمان کیخلاف مقدمہ درج کرلیا گیا دیگر نامزد 7 اہلکاروں کی گرفتاری کیلئے چھاپے مارے جارہے ہیں۔
ایف آئی اے حکام کے مطابق اینٹی کرپشن اسلام آباد نے پاکستان ایگری کلچرل ریسرچ کونسل میں بھرتیوں کے کیس میں کارروائی کرتے ہوئے پی اے آر سی کے چیئرمین ڈاکٹر غلام محمد علی کو گرفتار کرلیا، ملزم پر غیرقانونی بھرتیوں اور اختیارات کے ناجائز استعمال کا الزام ہے۔
ایف آئی اے کے مطابق پی اے آر سی کے ڈائریکٹر اسٹیبلشمنٹ اخلاق ملک کو بھی گرفتار کرلیا گیا ہے، دونوں گرفتار افسران کو آج عدالت میں پیش کرکے ریمانڈ لیا جائے گا۔
دونوں ملزمان کیخلاف ایف آئی اے اینٹی کرپشن نے سرکار کی مدعیت میں مقدمہ بھی درج کرلیا۔ متن میں بتایا گیا ہے کہ 164 اسامیوں پر 332 افراد غیر قانونی بھرتی کئے گئے۔
ایف آئی اے ذرائع کا کہنا ہے کہ نامزد دیگر 17 افسر و اہلکاروں کی گرفتاری کیلئے چھاپے جاری ہیں۔
