وفاقی وزیر داخلہ محسن نقوی نے حوالہ ہنڈی، جعلی ادویات اور بھکاری مافیا کے خلاف بلا امتیاز اور سخت کارروائی کی ہدایات جاری کر دی گئیں۔ بیرون ملک سے ڈی پورٹ ہوکر آنے والے بھکاریوں کی گرفتاری یقینی بنانے کا حکم دے دیا۔
وفاقی وزیر داخلہ محسن نقوی نے ایف آئی اے کراچی زون کا دورہ کیا اور اجلاس کی صدارت کی۔ انہوں نے حوالہ ہنڈی میں ملوث بڑے افراد کے خلاف موثر کریک ڈاؤن کا حکم دیتے ہوئے کہا کہ کسی کا دباؤ قبول کیے بغیر بلا امتیاز کارروائی کی جائے۔
محسن نقوی نے بھکاریوں کو بیرون ملک بھجوانے والے ایجنٹ مافیا کو ختم کرنے کی ہدایت بھی جاری کی۔ان کا کہنا تھا کہ یہ مافیا پاکستان کا عالمی امیج خراب کر رہا ہے، اور مفرور ایجنٹس کو دیگر صوبوں کے تعاون سے فوری گرفتار کیا جائے۔بیرون ملک سے ڈی پورٹ ہوکر آنے والے بھکاریوں کی گرفتاری کو بھی یقینی بنایا جائے۔
وزیر داخلہ نے جعلی ادویات کے خلاف زیرو ٹالرنس پالیسی کا اعلان کرتے ہوئے کہا کہ اس مکروہ دھندے میں ملوث عناصر کی اصل جگہ جیل ہے، ان سے آہنی ہاتھوں سے نمٹا جائے۔نان کسٹم مصنوعات کے خلاف بھرپور کارروائی کا حکم بھی جاری کیا گیا۔
محسن نقوی نے ہدایت کی کہ پانچ ہزار ڈالر سے زائد رقم لے کر بیرون ملک جانے والے مسافروں کے خلاف قانون کے مطابق سخت کارروائی کی جائے۔
