وزیراعظم شہبازشریف کا کہنا ہے کہ تارکین وطن نے محنت سے ترسیلات زر سے لاکھوں خاندانوں کو ترقی دی۔ رواں سال اوورسیزپاکستانیوں نے ریکارڈ 34.9 بلین ڈالر وطن بھیجے۔
وزیراعظم نے خاندانی ترسیلات کے عالمی دن پرتارکین وطن کو معیشت میں شراکت پرخراج تحسین پیش کیا۔ اپنے پیغام میں کہا کہ بیرون ملک مقیم پاکستانیوں کی ترسیلات زرمعیشت کی بنیاد رہی ہیں۔
وزیراعظم شہبازشریف کا کہنا تھا کہ تارکین وطن نے محنت سے اپنے آبائی ممالک میں ترقی کی راہ ہموار کی۔ 9 ملین سے زائد پاکستانی دنیا کے مختلف ممالک میں مقیم ہیں جو کہ اپنی جڑوں سے گہرے طور پر وابستہ ہیں، انکے مالی عطیات اپنے خاندانوں اور ملکی ترقی کا طاقتور ستون ہیں۔ہم اپنی عالمی پاکستانی کمیونٹی کوتہہ دل سے خراج تحسین پیش کرتے ہیں۔
شہبازشریف کا مزید کہنا تھا کہ موجودہ مالی سال اوورسیز پاکستانیوں نے رکارڈ 34.9 ڈالر وطن بھیجے، موجودہ مالی سال کی ترسیلات زر پچھلے سال کے مقابلے میں 28.8 فیصد زیادہ ہیں، یہ مثبت اشاریے ہمارے تارکین وطن کی محنت اور وفاداری کا ثبوت ہیں۔
