قومی اقتصادی سروے 2024-25 کے مطابق رواں مالی سال کے پہلے 9 ماہ (جولائی 2024 تا مارچ 2025) کے دوران حکومتی قرضوں میں 4,090 ارب روپے کا اضافہ ہوا۔
سروے کے مطابق مارچ 2025 تک وفاقی حکومت کے مجموعی قرضوں کا حجم 69,195 ارب روپے تک پہنچ گیا جو جون 2024 میں 65,105 ارب روپے تھا۔
مارچ 2025 تک مقامی قرضوں کا حجم 51,518 ارب روپے ریکارڈ کیا گیا جبکہ بیرونی قرضوں کا حجم 24,489 ارب روپے رہا۔
قرضوں میں اضافے کی بنیادی وجہ حکومتی اخراجات اور مالیاتی خسارے کو پورا کرنے کے لیے قرضوں پر انحصار ہے۔
ٹیکس چھوٹ کے حوالے سے سروے کے مطابق، رواں مالی سال مختلف شعبوں کو 5,840 ارب روپے کی ٹیکس چھوٹ دی گئی جس میں سب سے زیادہ 4,253 ارب روپے سیلز ٹیکس، 800 ارب روپے سے زائد انکم ٹیکس، اور 785 ارب روپے کسٹم ڈیوٹی کی مد میں شامل ہیں۔
