پاکستان سپر لیگ ( پی ایس ایل ) 10 کے فائنل میچ میں پاکستان بحریہ کے بہادر سپوتوں کو زبردست خراج تحسین پیش کیا گیا ہے۔
اتوار کو کھیلے گئے پاکستان سپر لیگ 10 کے فائنل میچ میں پاکستان بحریہ کے سربراہ ایڈمرل نوید اشرف قذافی اسٹیڈیم پہنچے جہاں چئیرمین پاکستان کرکٹ بورڈ ( پی سی بی ) محسن نقوی نے انکا خیر مقدم کیا۔
فائنل میچ میں پاک بحریہ کے بہادرسپوتوں کو زبردست خراج تحسین پیش کیا گیا جبکہ اس موقع پر معروف گلوکاروں کے ملی نغمے ، شائقین کا بھرپور جوش وخروش اور ہر طرف قومی پرچموں کی بہار نظر آئی۔
قذافی اسٹیڈیم ’’ پاکستان زندہ باد ‘‘ کے نعروں سے گونجتا رہا اور پاک بحریہ کی پیشہ وارانہ صلاحیتوں اور تیاریوں کو سراہا گیا۔
اس موقع پر چیئرمین پی سی بی محسن نقوی کا کہنا تھا کہ پاک بحریہ کی بھرپور تیاریوں کے باعث دشمن ہماری سمندری حدود پر حملہ کرنے کی جرات نہ کرسکا، زندہ قومیں اپنے ہیروز کو ہمیشہ یاد رکھتی ہیں، 10 مئی کا دن پاکستان کی دفاعی تاریخ کا روشن ترین باب ہے۔
امریکہ کی قائم مقام سفیر نیٹلی بیکر ، وفاقی وزیر خزانہ محمداورنگ زیب ، سیاسی اکابرین اور اعلیٰ سول و عسکری حکام بھی اسٹیڈیم میں موجود تھے۔
