سندھ کے وزیر خوراک مخدوم محبوب الزمان نے محراب پور میں مبینہ مضرِ صحت کھانا کھانے سے ایک ہی خاندان کے 3 افراد کے جاں بحق اور 5 افراد کے متاثر ہونے کے واقعے کا نوٹس لے لیا ہے۔
وزیر خوراک سندھ نے سندھ فوڈ اتھارٹی کو واقعے کی فوری تحقیقات کرنے کی ہدایت دیتے ہوئے کہا ہے کہ ایک ہی خاندان کے 3 افراد کے جاں بحق اور 5 کے متاثر ہونے کا معاملہ انتہائی افسوسناک ہے۔
مخدوم محبوب الزمان نے ہدایت کی کہ مکمل انکوائری کرکے واقعے کی اصل وجوہات اور ممکنہ غفلت کا تعین کیا جائے، جبکہ متعلقہ حکام متاثرہ خاندان اور اسپتال انتظامیہ سے فوری رابطہ کریں۔
انہوں نے سندھ فوڈ اتھارٹی کو ہدایت کی کہ فوڈ سیمپلز حاصل کرکے لیبارٹری ٹیسٹ کے لیے بھیجے جائیں ۔
