وفاقی وزیرداخلہ محسن نقوی نے اسلام آباد میں غیرقانونی تعمیرات کے خلاف فوری آپریشن کا فیصلہ کرلیا۔
وزیر داخلہ کی زیرصدارت اجلاس میں غیر منظور شدہ ہاؤسنگ سوسائٹیز اور بغیر منظوری گھروں کے خلاف کارروائی کا حکم دیدیا گیا، اجلاس میں میں وزیر مملکت طلال چوہدری ، وفاقی سیکرٹری داخلہ اور اسلام آباد انتظامیہ اور پولیس کے دیگر اعلیٰ حکام شریک ہوئے۔
محسن نقوی کا کہنا تھا غیر منظورشدہ ہاؤسنگ سوسائٹیز اور گھروں کے خلاف آپریشن میں زیرو ٹالرنس پالیسی پر عملدرآمد یقینی بنائیں۔ لینڈ انفارمیشن اینڈ مینجمنٹ سسٹم سے سیٹلائٹ میپنگ کرکے ہرقسم کی غیرقانونی تعمیرات روکی جائیں۔ اسلام آباد میں شہریوں کو عالمی معیار کی خدمات کی فراہمی پہلی ترجیح ہونی چاہیے ۔ شہریوں کے جان ومال کے تحفظ کیلئے کوئی کسر اٹھا نہ رکھی جائے۔
وفاقی دارالحکومت میں پولیس اور انتظامیہ کے امیج کو بہتر بنانا ہے ۔ یہ اس وقت ممکن ہے جب شہری انتظامیہ اور پولیس پر اعتماد کا اظہار کریں گے۔ شہریوں کی سہولت کیلئے نئی تجاویز لائیں ۔ ان پر عمل میں ہرممکن تعاون فراہم کیا جائے گا ۔ پورے عزم سے اس عمل کو قومی جذبے سے آگے بڑھائیں۔
وزیر داخلہ کی اسلام آباد میں اشیائے ضروریہ کی قیمتوں پر مؤثر کنٹرول یقینی بنانے اور عیدالاضحیٰ کے دنوں میں شہر کی صفائی کا خصوصی خیال رکھنے کی بھی ہدایت کی۔
