وفاقی وزیر صحت مصطفیٰ کمال نے جنیوا میں فلسطینی ہم منصب سے ملاقات کی، غزہ کی صورتحال، طبی امداد اور اسرائیلی جارحیت پر تفصیلی گفتگو کی گئی۔ مصطفیٰ کمال نے کہا کہ پاکستان نے دنیا کی توجہ اسرائیل کی غزہ میں جاری جارحیت، بالخصوص اسپتالوں اور طبی عملے پر حملوں کی طرف مبذول کروائی ہے، نسل کشی پر مبنی مہم اور مظالم فوری طور پر بند ہونے چاہئیں۔
عالمی ادارۂ صحت کی اسمبلی کے موقع پر ہونیوالی ملاقات میں وزیر صحت نے وزیراعظم شہباز شریف کا خصوصی پیغام بھی فلسطینی ہم منصب تک پہنچایا۔
وفاقی وزیر صحت سید مصطفیٰ کمال نے عالمی ادارہ صحت کے 78ویں اجلاس کے موقع پر فلسطین کے وزیر صحت ڈاکٹر ماجد ابو رمضان سے ملاقات کی۔
— Syed Mustafa Kamal (@KamalMQM) May 21, 2025
انہوں نے وزیر اعظم میاں شہباز شریف کا پیغام پہنچاتے ہوئے فلسطینی کاز کے لیے پاکستان کی غیر متزلزل حمایت کا اعادہ کیا۔
فلسطین کے وزیر صحت نے فلسطینی… pic.twitter.com/QmQ22vAPz1
دونوں وزرائے صحت نے غزہ کے مظلوم اور محصور عوام کو طبی اور انسانی امداد فراہم کرنے کے مختلف طریقوں پر تبادلہ خیال کیا۔
مصطفیٰ کمال کا کہنا تھا کہ پوری پاکستانی قوم بہادر فلسطینی عوام کے ساتھ کھڑی ہے، اسرائیل کی جانب سے اسپتالوں اور طبی عملے کو جان بوجھ کر نشانہ بنانا انتہائی افسوسناک اور انسانیت سوز اقدام ہے، جس کی پاکستان شدید ترین الفاظ میں مذمت کرتا ہے۔
انہوں نے کہا کہ اسرائیلی مظالم اور نسل کشی پر مبنی یہ مہم فوری طور پر بند ہونی چاہئے۔
فلسطینی وزیر نے پاکستان کی تاریخی، اصولی اور مسلسل حمایت کو سراہا۔
