ڈی جی آئی ایس پی آر لیفٹننٹ جنرل احمد شریف کا کہنا ہے کہ امن کی کوششوں میں ایک بار پھر پاکستان نے ذمہ داری کا مظاہرہ کیا، بھارت کی یکطرفہ جارحیت کے باوجود پاکستان نے دفاعی اور محتاط ردعمل دیا اور اب بھی مذاکرات کیلئے تیار ہے۔
ترجمان پاک فوج لیفٹیننٹ جنرل احمد شریف چوہدری نے نیویارک ٹائمز سے گفتگو میں بتایا کہ پاکستان نے ایک بار پھر ذمہ دارانہ عسکری مؤقف اختیار کرتے ہوئے امن کی خواہش ظاہر کی ہے۔
نیویارک ٹائمز کی رپورٹ کے مطابق 7 مئی کو بھارت نے پاکستان پر یکطرفہ میزائل حملے کیے، جواب میں پاکستان نے تحمل کا مظاہرہ کیا اور اپنی کارروائیوں کو دفاع تک محدود رکھا، رپورٹ کے مطابق پاک فضائیہ نے مؤثر ردعمل دیتے ہوئے بھارت کے 6 جنگی طیارے مار گرائے۔
ڈی جی آئی ایس پی آر نے نیویارک ٹائمز کو انٹرویو میں کہا کہ جنگ کے بعد بھی دونوں ممالک کے اعلیٰ عسکری افسران میں رابطہ برقرار ہے، دشمن کی جانب سے نور خان ایئربیس سمیت چند مقامات کو نشانہ بنایا گیا مگر پاکستان کی فضائی صلاحیت مکمل طور پر فعال ہے۔
ڈی جی آئی ایس پی آر نے کہا کہ پاکستان نے اپنے جانی و مالی نقصانات کے بارے میں مکمل شفافیت دکھائی ہے۔ انہوں نے سوال اٹھایا کہ کیا بھارت بھی اپنے نقصانات پر اتنی ہی دیانتداری کا مظاہرہ کر رہا ہے؟۔
نیویارک ٹائمز کا کہنا ہے کہ پاکستان نے سیز فائر کا احترام کرتے ہوئے ذمہ داری کا ثبوت دیا لیکن بھارت کی جانب سے اشتعال انگیزی جاری ہے۔
