پاکستان میں سوشل میڈیا صارفین کیلئے قومی سائبر ایمرجنسی رسپانس ٹیم کی جانب سے اہم ایڈوائزری جاری کردی گئی، جس میں حساس معلومات شیئر کرنے سے باز رہنے اور تصدیق شدہ ذرائع پر انحصار کی ہدایت کی گئی ہے۔
سوشل میڈیا پر غیرتصدیق شدہ معلومات کی گردش پر نیشنل سرٹ نے خبردار کردیا۔ ایڈوائزری میں کہا گیا ہے کہ صارفین فوجی نقل و حرکت، آپریشنز یا کسی واقعے سے متعلق تصاویر اور ویڈیوز شیئر کرنے سے گریز کریں، کسی بھی اطلاع کو شیئر کرنے سے قبل معتبر ذرائع اور شواہد کی تصدیق ضرور کریں۔
نیشنل سرٹ کا کہنا ہے کہ غلط افواہیں، فیک نیوز اور ڈیس انفارمیشن قومی سلامتی کو نقصان پہنچا سکتی ہیں، حساس معلومات کا شیئر کیا جانا دشمن عناصر کیلئے سہولت پیدا کرتا ہے اور آپریشنل سیکیورٹی میں خلل کا باعث بن سکتا ہے۔
ایڈوائزری میں عوام کو جذباتی اور سنسنی خیز مواد سے بھی خبردار رہنے کی تلقین کی گئی ہے۔
واضح رہے کہ بھارت کی جانب سے 6 اور 7 مئی کے حملے کے بعد ایک بار پھر 9 اور 10 مئی کی درمیانی شب پاکستان پر حملہ کیا گیا، جس میں میزائلوں سے تین ایئر بیسز نور خان، شور کوٹ اور مرید ایئر بیس کو نشانہ بنانے کی کوشش کی گئی۔
پاک فوج نے بھارتی جارحیت کا جواب دینے کیلئے آپریشن ’’بنیان مرصوص‘‘ کا آغاز کیا اور بھارت کے متعدد شہروں میں 26 سے زائد مقامات کو بھرپور قوت سے نشانہ بنایا۔
پاکستان نے متعدد ایئر بیسز، اسلحہ کے ڈپو اور فوجی تنصیبات کو نشانہ بنایا، بھارتی فوج نے پاکستانی حملوں میں جانی و مالی نقصان کا اعتراف کیا ہے۔
