وزیراعظم شہباز شریف نے سیاسی رہنماؤں سے رابطے کرکے بھارت کیخلاف پاکستانی فورسز کے آپریشن ’’بنیان مرصوص‘‘ پر اعتماد میں لیا۔ انہوں نے کہا کہ بھارت کی پے در پے کارروائیوں کا ہماری بہادر افواج نے بھرپور جواب دیا ہے۔

رپورٹ کے مطابق وزیراعظم شہباز شریف نے چیئرمین پیپلزپارٹی بلاول بھٹو زرداری، پاکستان تحریک انصاف کے چیئرمین بیرسٹر گوہر، جمعیت علمائے اسلام کے سربراہ مولانا فضل الرحمان، امیر جماعت اسلامی حافظ نعیم الرحمٰن، ایم کیو ایم کے کنوینر ڈاکٹر خالد مقبول صدیقی، خالد مگسی اور چوہدری سالک حسین کو فون کرکے بھارت کیخلاف جوابی کارروائی کے سلسلے میں اعتماد میں لیا۔

وزیراعظم نے ملکی سیاسی قیادت کو بھارت کے حملے، پیش آنے والی صورتحال اور بھارت کو دیئے جانے والے پاکستانی فورسز کے جواب کی تفصیلات سے آگاہ کیا۔

انہوں نے کہا کہ افواج پاکستان نے بھارتی جارحیت کا مربوط طریقے سے پر زور اور طاقتور جواب دیا ہے، بھارت نے پاکستان پر میزائل اور ڈرون حملے کیے، ان جارحانہ اقدامات کے باوجود پاکستان نے انتہائی تحمل سے کام لیا۔

وزیراعظم کا کہنا تھا کہ پہلگام واقعے کے بعد پاکستان نے حقائق جاننے کیلئے غیر جانبدارانہ تحقیقات کا کہا، جس کو بھارت نے ٹھکرا دیا، آج صبح دوبارہ بھارت نے نور خان ایئربیس اور دیگر مقامات پر میزائل سے حملے کیے، بھارتی حملوں میں نہتے اور معصوم شہریوں کو نشانہ بنایا گیا، بھارت کی ان پے در پے کارروائیوں کا ہماری بہادر افواج نے بھرپور جواب دیا۔

شہباز شریف نے مزید کہا کہ جوابی کارروائی میں ان ملٹری تنصیبات کو نشانہ بنایا جہاں سے پاکستان پر حملے ہوئے، آج ہم نے بھارت کو منہ توڑ جواب دیا ہے اور بے گناہوں کے خون کا بدلہ لے لیا ہے، ہمیں اپنی افواج پر فخر ہے، آپ سمیت پوری قوم کو میں اس کامیاب آپریشن پر مبارکباد پیش کرتا ہوں، ملکی سالمیت کو نقصان پہنچانے کی مذموم بھارتی کوششوں کو ناکام بنانے کیلئے پُرعزم ہیں۔

پاکستانی سیاسی قیادت نے پاک فوج کے جوانوں کے تدبر، حوصلے اور پیشہ ورانہ مہارت کو خراج تحسین پیش کیا اور وزیراعظم کو مشکل کی اس گھڑی میں تعاون اور یکجہتی کا یقین دلایا۔

سیاسی قیادت نے کہا کہ مادر وطن کے دفاع کیلئے ہماری بہادر افواج کی مہارت قابل تحسین ہے۔ وزیراعظم نے ملکی سیاسی قیادت کا واشگاف الفاظ میں ساتھ دینے پر تشکر کا اظہار کیا۔

امیر جماعت اسلامی حافظ نعیم الرحمان نے کہا کہ جماعت اسلامی بھارت کو ٹھوس جواب دینے پر مبارکباد پیش کرتی ہے، سفارتکاری پر توجہ دی جائے اور پوری دنیا کو صورتحال اور اپنے مؤقف سے آگاہ کیا جائے۔

حافظ نعیم الرحمان نے کہا کہ تمام اختلافات ختم، پوری قوم یکجان ہے، جماعت اسلامی جکومت اور افوج پاکستان کی پشت پر ہے۔