پاک فضائیہ کے ایئر وائس مارشل اورنگزیب احمد نے کہا ہے کہ پاکستان کا فضائی دفاعی نظام نہ صرف انتہائی تیزی سے حرکت کرنے والے ہتھیاروں بلکہ ہائپر سونک ہتھیاروں سے بھی نمٹنے کی مکمل صلاحیت رکھتا ہے۔
ڈی جی آئی ایس پی آر کے ہمراہ ایک پریس بریفنگ میں صحافیوں کے سوالات کے جوابات دیتے ہوئے پاک فضائیہ کے ایئر وائس مارشل اورنگزیب احمد نے کہا کہ پاکستان اور بھارت دونوں کے پاس کارگر فضائی دفاعی نظام موجود ہیں۔
ایئر وائس مارشل نے انکشاف کیا کہ 6 اور 7 مئی کی درمیانی شب بھارتی حملوں کے دوران تباہ کیے گئے دو بھارتی طیاروں میں سے ایک کو پاکستان کے فضائی دفاعی نظام نے نشانہ بنایا۔ انہوں نے بتایا کہ پاک فضائیہ بھارتی حملوں کے خلاف صرف دو منٹ کے اندر سرگرم ہوگئی تھی اور ایک گھنٹے سے زائد وقت تک بھارتی طیاروں کے ساتھ ٹکراؤ کی صورتحال رہی۔
بریفنگ کے دوران ایئر وائس مارشل نے بھارتی رافیل طیاروں کے پائلٹس کی انٹرسیپٹ کی گئی گفتگو بھی سنائی اور بتایا کہ پاک فضائیہ نے کس طرح بھارتی طیاروں کو مختلف مقامات پر نشانہ بنایا۔ انہوں نے پاک فضائیہ کی پیشہ ورانہ صلاحیتوں اور تیاری کو سراہتے ہوئے کہا کہ پاکستانی دفاعی نظام کسی بھی جارحیت کا منہ توڑ جواب دینے کے لیے ہر دم تیار ہے۔
