انڈین پریمیئر لیگ میں ایک اور فراڈ سامنے آگیا، آئی پی ایل میں سنچری بنانے والے مبینہ طور پر 14 سالہ کرکٹر کرکٹر ویبھو سوریا ونشی کی عمر پر سوال اٹھ گئے۔
انڈین پریمیئر لیگ میں گزشتہ دنوں راجستھان رائلز کے کم عمر ترین کھلاڑی ویبھو سوریا ونشی نے کرکٹ کی دنیا میں تہلکہ مچایا اور 14 سال کی عمر میں سنچری اسکور کرکے نئی تاریخ رقم کی۔
نوجوان کھلاڑی نے گجرات ٹائٹنز کیخلاف 35 گیندوں پر سنچری بنا کر ناصرف آئی پی ایل بلکہ کسی بھی بھارتی کی جانب سے تیز ترین ٹی 20 سنچری کا ریکارڈ قائم کردیا۔
ویبھو سوریا ونشی آئی پی ایل میں سنچری اسکور کرنیوالے کم عمر ترین کھلاڑی بھی بنے۔ جہاں 14 سالہ سوریا ونشی کی بیٹنگ کی تعریف کی جارہی ہے، وہیں ان کی عمر کے حوالے سے بھی سوالات اٹھ رہے ہیں کہ ان کی عمر 14 سال نہیں بلکہ تقریباً 16 سال ہے۔
سابق بھارتی باکسر وجیندر سنگھ نے سوشل میڈیا پوسٹ کے ذریعے بظاہر سوریا ونشی کی عمر پر سوال اٹھایا کہ کیا اب کرکٹ میں بھی عمر کی جعلسازی عام ہوچکی ہے؟، انہوں نے کہا کہ 'بھائی آج کل عمر چھوٹی کرکے کرکٹ میں بھی کھیلنے لگے ہیں'۔
اس کے علاوہ سوشل میڈیا پر صارفین بھی سوریا ونشی کی عمر کے حوالے سے سوالات اٹھا رہے ہیں۔
ان سوالات کے اٹھنے کی اصل وجہ سوریاونشی کا وائرل ہونیوالا ایک پرانا انٹرویو ہے جو 2023ء میں لیا گیا تھا جس میں سوریا ونشی نے بتایا تھا کہ ان کی عمر 14 سال ہے۔
اگر 2023ء میں سوریا ونشی 14 سال کے تھے تو اس حساب سے 2025ء میں ان کی عمر 16 سال بنتی ہے۔
بھارتی میڈیا ہو یا پھر مشہور کرکٹ ویب سائٹ کرک انفو، سوریا ونشی کی عمر ابھی 14 سال ہی بتارہے ہیں۔
کرک انفو کی ویب سائٹ پر سوریا ونشی کی تاریخ پیدائش 27 مارچ سن 2011ء درج ہے۔ اس حساب سے ان کی عمر 14 سال اور 36 دن بنتی ہے لیکن اگر سوریا کے 2023ء کے انٹرویو کو دیکھیں تو اس حساب سے وہ 16 سال کے ہیں۔
کیا سوریا ونشی نے آئی پی ایل میں جان بوجھ کر اپنی اصل عمر چھپائی؟، انہوں نے اپنی عمر کے حوالے سے جھوٹ بولا، یہ وہ سوالات ہیں جو اس وقت سوشل میڈیا پر اٹھائے جارہے ہیں۔
اس حوالے سے سوریا ونشی یا آئی پی ایل فرنچائز راجستھان رائلز کا کوئی ردعمل سامنے نہیں آیا۔
واضح رہے کہ آئی پی ایل کی میگا نیلامی میں راجستھان رائلز نے سوریا ونشی کو ایک کروڑ 10 لاکھ بھارتی روپے (تقریباً 3 کروڑ پاکستانی روپے) میں خریدا تھا۔
