پاکستان سپر لیگ ( پی ایس ایل ) 10 کے 20 ویں میچ میں کراچی کنگز نے ملتان سلطانز کو 87 رنز سے شکست دے دی جس کے بعد ایونٹ میں سلطانز کا سفر اختتام پزیر ہوگیا۔
لاہور کے قذافی اسٹیڈیم میں پاکستان سپر لیگ (پی ایس ایل) سیزن 10 کے 20 ویں میچ میں کراچی کنگز نے ملتان سلطانز کے خلاف ٹاس جیت کر پہلے بیٹنگ کا فیصلہ کیا اور شاندار کارکردگی کا مظاہرہ کرتے ہوئے 20 اوورز میں 4 وکٹوں کے نقصان پر 204 رنز بنائے۔
کراچی کنگز کی جانب سے جیمز ونس نے 65 رنز کی شاندار اننگز کھیلی جبکہ عرفان خان نے 40، خوشدل شاہ نے 33، کپتان ڈیوڈ وارنر نے 30 اور ٹم سائفرٹ نے 22 رنز کا حصہ ڈالا۔
ملتان سلطانز کے بولرز میں عبید شاہ سب سے کامیاب رہے جنہوں نے 2 وکٹیں حاصل کیں جبکہ کیمفر اور ڈیوڈ ولی نے ایک، ایک وکٹ اپنے نام کی۔
جواب میں ملتان سلطانز 205 رنز کے تعاقب میں 117 رنز پر ڈھیر ہوگئی اور ساتھ ہی پلے آف راؤنڈ کی دوڑ سے بھی باہر ہوگئی۔
سلطانز کی جانب سے کامران غلام 29 اور یاسر خان 26 رنز بنا کر نمایاں رہے۔
کراچی کنگز کی جانب سے محمد نبی نے 3 کھلاڑیوں کو آؤٹ کیا۔
