لاطینی امریکی ملک ایکواڈور آج علی الصبح شدید زلزلے سے لرز اٹھا۔ ریکٹر اسکیل پر 6.3 شدت کے اس زلزلے نے شمال مغربی ساحلی شہر ایسمرالڈس کو ہلا کر رکھ دیا۔ حکام کے مطابق زلزلے کے نتیجے میں کم از کم 20 افراد زخمی ہو گئے جبکہ 135 خاندان متاثر ہوئے ہیں۔
زلزلہ صبح 6 بج کر 45 منٹ پر آیا اور اس کے جھٹکے ملک کے کم از کم 10 مختلف صوبوں میں محسوس کیے گئے۔ ارضیاتی ماہرین کے مطابق زلزلے کی گہرائی 30 کلومیٹر تھی، جو زیرزمین توانائی کے شدید اخراج کا سبب بنی۔
زلزلے کے باعث متعدد سرکاری و نجی عمارتوں کو نقصان پہنچا۔ شہریوں نے خوف کے مارے گھروں اور دفاتر سے نکل کر کھلے میدانوں کا رخ کیا، جبکہ کئی علاقوں میں بجلی کی فراہمی عارضی طور پر معطل ہو گئی۔
حکام کا کہنا ہے کہ فوری طور پر سونامی کا کوئی خطرہ نہیں، اس لیے سونامی وارننگ جاری نہیں کی گئی۔ تاہم متاثرہ علاقوں میں ریسکیو اور ریلیف سرگرمیاں تیزی سے جاری ہیں اور زخمیوں کو فوری طبی امداد دی جا رہی ہے۔
حکومتی ادارے عمارتوں کے ملبے کو صاف کرنے اور متاثرہ خاندانوں کو عارضی پناہ گاہوں میں منتقل کرنے میں مصروف ہیں۔ ماہرین نے خبردار کیا ہے کہ آفٹر شاکس کا امکان ابھی باقی ہے، اس لیے شہریوں کو احتیاط برتنے کی ہدایت جاری کی گئی ہے۔
