محکمہ موسمیات کے مطابق ملک بھر میں گرمی کی شدت میں اضافہ ہو گیا ہے اور آئندہ دو روز تک بیشتر علاقوں میں موسم گرم اور خشک رہنے کا امکان ہے۔
آج سے ملک کے مختلف اضلاع میں ہیٹ ویو کا خدشہ ظاہر کیا گیا ہے، جبکہ سندھ کے کئی علاقے اس کی لپیٹ میں آ چکے ہیں۔
محکمے نے خبردار کیا ہے کہ شہری غیر ضروری طور پر دھوپ میں نکلنے سے گریز کریں اور احتیاطی تدابیر اختیار کریں۔
اتوار کے روز سندھ کے کئی اضلاع شدید گرمی کا شکار رہے، دادو میں درجہ حرارت 46 ڈگری سینٹی گریڈ تک جا پہنچا، جبکہ شہید بینظیر آباد میں 45 ڈگری ریکارڈ کیا گیا۔
کراچی میں پارہ 36 ڈگری پر رہا، حیدرآباد میں 43، سکھر میں 44، لاہور میں 36، بہاولپور میں 40 اور ملتان میں 39 ڈگری سینٹی گریڈ ریکارڈ کیا گیا۔ شدید گرمی کے باعث شہری نڈھال دکھائی دیے اور معمولاتِ زندگی متاثر ہو کر رہ گئے۔
محکمہ موسمیات نے عوام کو مشورہ دیا ہے کہ پانی کا زیادہ استعمال کریں، دھوپ سے بچاؤ کے لیے مناسب اقدامات کریں اور ہیٹ اسٹروک سے محفوظ رہنے کی کوشش کریں۔
