عیدالفطر کے دوران پنجاب میں عارضی نصب مکینیکل جھولوں پر پابندی عائد کر دی گئی۔
محکمہ داخلہ پنجاب کی جانب سے مکینیکل جھولوں پر پابندی کا فیصلہ انسانی جانوں کے تحفظ کیلئے کیا گیا اور پابندی کا اطلاق پنجاب بھرمیں ہوگا جبکہ اس حوالے سے ڈپٹی کمشنرز کے نام مراسلہ بھی جاری کردیا گیا ہے۔
مراسلے کے مطابق عید کے دوران پارکوں میں بچوں سمیت بڑی تعداد میں لوگوں کی آمد متوقع ہے اور تفریحی پارکس، تھیم پارکس، پلے ایریاز میں مستقل لگائے گئے مکینکل جھولوں کی مشروط اجازت ہوگی جبکہ مستقل بنیادوں پر لگائے گئے جھولوں کیلئے فٹنس سرٹیفکیٹ کا حصول لازمی قرار دیا گیا ہے۔
محکمہ داخلہ پنجاب میں مرکزی کنٹرول روم بھی قائم کردیا گیا ہے جو 24 گھنٹے پنجاب بھر سے رپورٹس مرتب کرے گا۔
محکمہ داخلہ کے مطابق امن و امان کا قیام اور حکومتی احکامات پر عملدرآمد یقینی بنایا جائے گا اور سینئر افسران کی قیادت میں عید کی چھٹیوں میں کام جاری رہے گا۔
