گورنر خیبرپختونخوا فیصل کریم کنڈی نے صدر پاکستان کی طرف سے صوبے کی 7 شخصیات کو صدارتی سول اعزازت سے نوازا۔
گورنر ہاؤس پشاور میں یوم پاکستان کے موقع پر تقسیم اعزازات کی پُروقار تقریب ہوئی، جس میں ایئر وائس مارشل تیمور اقبال، سیکریٹری محکمہ انتظامیہ شاہد سہیل سمیت اعزازات وصول کرنیوالوں کے عزیز و اقارب نے بڑی تعداد میں شرکت کی، گورنر نے صوبہ کی 4 شخصیات کو تمغۂ شجاعت اور 3 شخصیات کو تمغۂ امتیاز سے نوازا۔
رپورٹ کے مطابق سعید خان مرحوم کو ان کی بہادری کے اعتراف میں بعد از وفات ’’تمغہ شجاعت‘‘ سے نوازا گیا، صاحب خان کو انکی بہادری کے اعتراف میں ’’تمغہ شجاعت‘‘ سے نوازا، ملک محمود جان شہید اور سمیع اللہ خان شہید کو انکی بہادری کے اعتراف میں صدارتی اعزاز ’’تمغہ شجاعت‘‘ عطاء کیا گیا۔
گورنر خیبر پختونخوا نے ڈاکٹر عاکف اللہ خان کو شعبہ طب میں گرانقدر خدمات پر صدارتی سول ایوارڈ ’’تمغہ امتیاز‘‘ سے نوازا، ارشد عزیز ملک کو شعبہ صحافت اور بختیار احمد خٹک کو شعبہ گلوکاری میں گرانقدر خدمات کے اعتراف میں صدارتی سول ایوارڈ ’’تمغہ امتیاز‘‘ عطاء کیا گیا۔
