انٹرنیشنل کرکٹ کونسل نے چیمپئنز ٹرافی سیمی فائنلز کیلئے میچ آفیشلز کا اعلان کردیا، کرس گفنی، رچرڈ النگورتھ، دھرما سینا اور پال ریفل فیلڈ امپائرز ہوں گے۔
آئی سی سی نے چیمپئنز ٹرافی 2025ء کے سیمی فائنلز کیلئے میچ آفیشلز کا اعلان کردیا گیا ہے۔ بھارت اور آسٹریلیا کے درمیان دبئی میں پہلے سیمی فائنل میں نیوزی لینڈ کے کرس گفنی اور انگلینڈ کے رچرڈ النگورتھ آن فیلڈ امپائر جبکہ مائیکل گف تھرڈ امپائر اور اینڈی پائیکرافٹ میچ ریفری ہوں گے۔
لاہور میں کھیلے جانے والے چیمپئنز ٹرافی کے دوسرے سیمی فائنل میں جنوبی افریقا اور نیوزی لینڈ آمنے سامنے ہوں گی، اس میچ کیلئے کمار دھرما سینا اور پال ریفل آن فیلڈ امپائر مقرر کئے گئے ہیں، جوئیل ولسن تھرڈ امپائر، احسن رضا چوتھے امپائر جبکہ رنجن مدوگالے میچ ریفری کے فرائض انجام دینگے۔
بھارت اور آسٹریلیا کے درمیان پہلا سیمی فائنل 4 مارچ کو دبئی میں کھیلا جائے گا جبکہ دوسرا سیمی فائنل جنوبی افریقا اور نیوزی لینڈ کے درمیان 5 مارچ کو قذافی اسٹیڈیم میں ہوگا۔
واضح رہے کہ پاکستان ٹیم چیمپئنز ٹرافی میں ایک بھی میچ نہیں جیت سکی تھی اور پہلے ہی راؤنڈ میں باہر ہوگئی تھی۔
بھارت کے فائنل میں پہنچنے کی صورت میں ایونٹ کا ٹائٹل میچ دبئی میں کھیلا جائے گا، اگر آسٹریلیا بھارت کو شکست دیتا ہے تو چیمپئنز ٹرافی فائنل لاہور کے قذافی اسٹیڈیم میں ہوگا۔
