صدر آصف علی زرداری نے کہا کہ موسمیاتی تبدیلی،غربت اورغلط معلومات کےچیلنجز سے نمٹنے کیلئےعالمی تعاون پر زور دیا اور کہا کہ جامع اور پائیدار ترقی کیلئے ملکوں کے درمیان تعاون کوفروغ کی ضرورت ہے، پاکستان وسط ایشیائی ممالک کے لیے گیٹ وے کی حیثیت رکھتا ہے، مشترکہ ترقی وخوشحالی کیلئے وسط ایشیائی ممالک گوادر بندرگاہ سے مستفید ہو سکتے ہیں۔
صدرمملکت آصف علی زرداری نے بین الاقوامی ورکشاپ برائے قیادت و استحکام کے شرکا سےخطاب کرتے ہوئے علاقائی روابط اور اقتصادی تعاون کے لئے پاکستان کے عزم کا اعادہ کیا اور کہا کہ ایک مستحکم دنیا مشترکہ ترقی کے لیے ناگزیر ہے، بین الاقوامی قیادت کی ذمہ داری ہے کہ وہ تعاون کے مواقع پیدا کرے ، قیادت لوگوں کی فلاح اور مشترکہ امن اور خوشحالی کے لیے کام کرے ، قیادت لوگوں کو مشترکہ وژن پرمتحد کرے ،پائیدارترقی کےاہداف کیلئے ترغیب دے،
ان کا کہناتھا کہ دیرپا تبدیلی لانےکیلئےتقسیم، تنازعات اورخوف کی بجائے تعاون ،اُمید کوفروغ دینا ہوگا۔
ورکشاپ کا انعقاد نیشنل ڈیفنس یونیورسٹی اسلام آباد کی جانب سے کیا گیا ، جس میں مختلف شعبوں سے تعلق رکھنے والے64 غیرملکی اور 32 پاکستانی شرکت کر رہے ہیں۔ شرکا نے صدر مملکت کو ورکشاپ کے اغراض و مقاصد سے متعلق بریف کیا ۔ صدر مملکت نے محفوظ و پائیدار مستقبل کیلئے عالمی شراکت داروں کو ملکر کام کرنے کی دعوت دی ۔
