چیمپئنز ٹرافی 2025 کے تیسرے میچ میں جنوبی افریقا نے افغانستان کو 107 رنز سے شکست دے دی، جنوبی افریقا نے 316 رنز کا ہدف دیا لیکن افغان ٹیم 208 رنز پر آل آؤٹ ہوگئی۔
جنوبی افریقا کی اننگ
کراچی کے نیشنل اسٹیڈیم میں کھیلے گئے میچ میں جنوبی افریقا نے ٹاس جیت کر پہلے بیٹنگ کا فیصلہ کیا، تاہم ان کی اننگ کا آغاز اچھا نہ رہا جب پہلی وکٹ 28 رنز پر گری اور ٹونی ڈی زوزی صرف 11 رنز بنا کر پویلین لوٹ گئے۔
اس کے بعد ریان ریکلٹن اور ٹمبا باؤما نے ذمہ داری سنبھالی اور میچ کو مستحکم کیا، دونوں نے نصف سنچریاں اسکورکیں لیکن باؤما 157 کے مجموعی اسکور پر محمد نبی کی گیند پر کیچ آؤٹ ہوگئے، انہوں نے 58 رنز بنائے۔
ریان ریکلٹن نے شاندار بیٹنگ جاری رکھی اور 103 رنز کی سنچری اسکور کی مگر وہ بھی آؤٹ ہوگئے۔
وین ڈر ڈیوسن اور ایڈین مارکرم نے ذمہ دارانہ انداز میں بیٹنگ کی اور دونوں نے 52، 52 رنز کی اننگز کھیلیں۔
جنوبی افریقا نے 50 اوورز میں 6 وکٹوں کے نقصان پر 315 رنز بنائے جبکہ افغانستان کی طرف سے محمد نبی نے 2 وکٹیں حاصل کیں اور فضل حق فاروقی، عظمت اللہ عمرزئی اور نور احمد نے ایک، ایک کھلاڑی کو آؤٹ کیا۔
افغانستان کی اننگ
316 رنز کے ہدف کے تعاقب میں افغانستان کی اننگ کا آغاز مایوس کن رہا، بیٹنگ لائن شروع ہی سے دباؤ میں آگئی اور 50 رنز کے اندر 4 کھلاڑی پویلین لوٹ گئے۔
رحمت شاہ نے ایک طرف سے مزاحمت کی اور رنز بناتے رہے لیکن دوسری طرف سے وکٹیں گرتی رہیں۔
رحمت شاہ نے 90 رنز کی شاندار اننگز کھیلی مگر باقی بیٹرز کی ناکامی کے باعث ٹیم 44 ویں اوور میں 208 رنز پر ڈھیر ہوگئی اور 107 رنز سے میچ ہار گئی۔
جنوبی افریقا کے بولرز میں کگیسو ربادا نے 3 وکٹیں لیں، لیونگی نگیڈی اور ویان ملڈر نے 2، 2 کھلاڑیوں کو آؤٹ کیا جبکہ مارکو جانسن اور کیشو مہاراج نے ایک، ایک وکٹ حاصل کی۔
