ہالی ووڈ کے لیجنڈ اداکار رچرڈ راؤنڈ ٹری 81 سال کی عمر میں انتقال کر گئے۔
میڈیا رپورٹس کے مطابق ایکشن تھرلر فرنچائز ’ شافٹ ‘ سے شہرت حاصل کرنے والے ہالی ووڈ کے لیجنڈ اداکار رچرڈ راؤنڈ ٹری کا 81 سال کی عمر میں انتقال ہوگیا ہے جبکہ ان کی موت کا اعلان ان کے دیرینہ مینجر پیٹرک میک مین کی جانب سے کیا گیا۔
پیٹرک میک مین نے بتایا کہ رچرڈ کا انتقال لبلبے کے کینسر کے باعث ہوا۔
9 جولائی 1942 کو نیو روچیل نیویارک میں پیدا ہونے والے لیجنڈ اداکار نے اپنی آخری سانسیں لاس اینجلس میں اپنے گھر پر اہلخانہ کی موجودگی میں لیں۔
رچرڈ راؤنڈ نے 1960 کی دہائی کے اوائل میں اپنے اداکاری کے کیریئر کا آغاز کیا تھا، انہیں جاسوس جان شافٹ کے کردار سے شہرت ملی اور وہ 29 سال کی عمر میں اسٹار بن گئے تھے۔
مرحوم اداکار اس سے قبل 1993 میں چھاتی کے کینسر سے بھی لڑ چکے تھے۔
رچرڈ نے دو شادیاں کی تھیں اور ان کے پانچ بچے ہیں جن میں چار بیٹیاں اور ایک بیٹا شامل ہے۔
