سپریم کورٹ میں 8 ججز کی تقرری کے لیے جوڈیشل کمیشن کا اجلاس جاری ہے۔
جسٹس منصور علی شاہ اور جسٹس منیب اختر نے چیف جسٹس پاکستان یحییٰ آفریدی صدارت جاری اجلاس سے بائیکاٹ کردیا، دونوں ججز نے چیف جسٹس کو اجلاس مؤخر کرنے کیلئے خط بھی لکھا تھا۔
کارروائی جاری رکھنے پر بیرسٹر گوہر اور علی ظفر نے بھی احتجاج کیا، بیرسٹر گوہر اور علی ظفر نے اپنا احتجاج میٹنگ منٹس کا حصہ بنوایا، دونوں ممبران احتجاج ریکارڈ کرانے کے بعد کارروائی کا بائیکاٹ کرگئے۔
اجلاس میں پانچوں ہائیکورٹ کے 24 سینئر ترین ججز کے ناموں پر غور کیا جارہا ہے، ہائی کورٹس کے 5 ، 5 سینئر ترین ججز کے ناموں پر غور کیا جا رہا ہے جبکہ اسلام آباد ہائیکورٹ کے 4 سینئر ترین ججز کے ناموں پر بھی غور کیا جارہا ہے۔
دوسری جانب چھبیسویں آئینی ترمیم اور جوڈیشل کمیشن اجلاس کے خلاف احتجاجی وکلا کا ڈی چوک میں دھرنا جاری ہے۔ اسلام آباد ہائی کورٹ بار کے وکلا بھی دھرنے میں شامل ہوگئے۔
صورتحال کے پیش نظر ڈی چوک میں پولیس کی بھاری نفری تعینات کردی گئی ہے، ڈی چوک سے شاہراہ دستور جانے والا راستہ خارداریں تاریں لگا کر بلاک کردیا گیا ہے، راولپنڈی اسلام آباد میٹرو بس سروس جزوی طور پر بند کردی گئی۔
