پراپرٹی اور تعمیراتی شعبے کو ریلیف دینے کیلئے مختلف تجاویز تیار کرلی گئی۔
پراپرٹی اور تعمیراتی شعبے کو ریلیف دینے کیلئے مختلف تجاویز تیار کرلی گئی، وزیراعظم نے تعمیراتی شعبہ کی بحالی کیلئے ٹاسک فورس قائم کی تھی، ٹاسک فورس اور وزارت ہاؤسنگ نے تجاویز ایف بی آر کو فراہم کر دیں۔
دستاویز کے مطابق نان فائلرز ایک کروڑ روپے مالیت تک کی جائیداد خرید سکیں گے۔ پراپرٹی کی فروخت سے متعلق 236 سی میں ٹیکس کی شرح کم کرنے کی تجویز بھی دی گئی ہے۔
مختلف کیٹگریز میں ٹیکس 4 سے کم کرکے ڈیڑھ سے دو فیصد کرنے، پراپرٹی کی خریداری پر ٹیکس 3 سے کم کرکے 0.5 فیصد کرنے کی تجویز ہے۔
پراپرٹی کی لین دین میں مجموعی طور پر 11 سے 14فیصد ٹیکس عائد ہیں، پراپرٹی کی خرید و فروخت پر ٹیکسز 4 سے 4.5 فیصد تک کرنے کی تجویز ہے۔ فائلرز کو 5 کروڑ روپے کی پراپرٹی کو ویلتھ اسٹیٹمنٹ میں شامل کرنےکی سہولت ملے گی۔
سمندر پار پاکستانیوں کے لیے پراپرٹی کی خریداری میں آسانیاں پیدا کی جائیں گی، اوورسیز پاکستانیوں کو نادرا سے آن لائن رجسٹرڈ ہونے کی سہولت دی جائے گی۔
