نادرا کی جانب سے قومی شناختی کارڈ کے قوانین میں ترامیم کی منظوری دے دی گئی، جس کے تحت تاحیات میعاد کے ساتھ منفرد قومی شناختی کارڈ کا اجراء کیا جائے گا۔
نادرا آرڈیننس 2000ء کے سیکشن 44 کے تحت نیشنل ڈیٹا بیس اینڈ رجسٹریشن اتھارٹی (نادرا) رولز 2002ء میں اہم ترامیم کی منظوری دے دی گئی ہے۔
ترجمان نادرا کے مطابق یہ تبدیلیاں اس نظام کو مزید جامع بنانے، دستاویزات کے طریقۂ کار کو آسان بنانے اور لوگوں کے مخصوص گروپوں کی مخصوص ضروریات کو پورا کرنے کیلئے ڈیزائن کی گئی ہیں۔
نئی ترامیم کے بعد اہم اپ ڈیٹ یہ ہے کہ خصوصی افراد کیلئے تاحیات میعاد کے ساتھ منفرد شناختی کارڈ کا اجراء ممکن ہوسکے گا، مزید برآں رہائشی اور غیر رہائشی بالغ شہری جنہیں وفاقی یا صوبائی حکام نے "خصوصی افراد" کے طور پر تسلیم کیا ہوا ہے، وہ وہیل چیئر لوگو والے قومی شناختی کارڈز کے بھی اہل ہوں گے، نادرا ان خصوصی این آئی سیز کے اجراء کا انتظام کرے گا۔
رولز میں نئی ترامیم کے تحت علاوہ ازیں معذور بچوں کیلئے، نادرا چائلڈ رجسٹریشن سرٹیفکیٹ یا جووینائل کارڈ کا اجراء بھی کیا جائے گا، جس میں وہیل چیئر کا نشان بھی ہوگا اور وہ قواعد کے مطابق مقرر کردہ مدت کیلئے درست ہوگا۔ خصوصی افراد کیلئے متعلقہ وفاقی یا صوبائی اداروں میں اندراج کو ضروری قرار دیا گیا ہے۔
اس کے ساتھ ساتھ اعضاء عطیہ کرنیوالے افراد کو بھی تاحیات میعاد کا خصوصی کارڈ جاری کیا جائے گا، جس میں ’وہیل چیئر‘ اور ڈونر‘ دونوں کے نشانات واضح ہوں گی، اعضاء کے عطیہ کیلئے متعلقہ ڈونر رجسٹریشن اتھارٹیز میں اندراج ضروری ہوگا۔
خیال رہے کہ یہ تبدیلیاں پاکستان بھر میں معذور افراد اور اعضاء کے عطیہ دہندگان کیلئے شمولیت کو یقینی بنانے اور ان کی شناخت کو بہتر کرنے کیلئے حکومت کی کوششوں میں ایک اہم قدم کی نشاندہی کرتی ہیں۔
ترجمان نادرا نے بتایا کہ قواعد میں ترامیم کا نوٹیفکیشن آئندہ گزٹ آف پاکستان میں شائع ہونے کے بعد نافذ العمل ہوگا، جس کے بعد یہ تبدیلیاں باقاعدہ طور پر لاگو کی جائیں گی۔
