ویسٹ انڈیز کرکٹ ٹیم کے کپتان کریگ بریتھ ویٹ نے الزام لگایا ہے کہ پاکستان نے ہوم ایڈوانٹیج کی وجہ سے مشکل پچ تیار کروائی۔
پاکستان نے ویسٹ انڈیز کیخلاف ملتان ٹیسٹ میں اسپنرز کی شاندار کارکردگی کی بدولت 127 رنز سے کامیابی حاصل کی، قومی ٹیم پہلی اننگز میں 230 رنز بناسکی جبکہ دوسری اننگز میں 157 رنز پر آؤٹ ہوگئی تھی، جبکہ مہمان ٹیم پہلی اننگز میں 137 رنز جبکہ دوسری اننگز میں 123 رنز پر ڈھیر ہوگئی تھی۔
ملتان ٹیسٹ تین روز میں ہی ختم ہوگیا تھا، اتوار کو میچ کے بعد گفتگو میں ویسٹ انڈیز کے کپتان کریگ بریتھ ویٹ نے کہا کہ ملتان کی پچ بہت مشکل تھی، جہاں بال بہت اسپن ہورہی تھی، پاکستان نے ہوم ایڈوانٹیج کی وجہ سے ایسی پچ تیار کروائی۔
انہوں نے کہا کہ پاکستان نے بھی دوسری اننگز میں اچھی بیٹنگ نہیں کی، میرے خیال میں پہلی اننگز میں ہم مزید بہتر بولنگ کرسکتے تھے۔
ویسٹ انڈیز کے کپتان کا کہنا تھا کہ ملتان میں پاکستانی شائقین نے ہمیں بھی سپورٹ کیا، شائقین کرکٹ کی سپورٹ دیکھ کر اچھا لگا۔
کریگ بریتھ ویٹ نے کہا کہ جومل وریکن نے بہت اچھی بولنگ کی، دوسرے ٹیسٹ میچ کیلئے امید ہے جومل وریکن دوبارہ اچھی بولنگ کریں گے، ہم دوسرے ٹیسٹ میچ میں کم بیک کریں گے۔
