پاکستان کی میزبانی میں چیمپئینز ٹرافی ٹورنامنٹ کے آغاز سے قبل مداحوں کا جوش بڑھانے کیلئے انٹرنیشنل کرکٹ کونسل (آئی سی سی) نے نیا پرومو جاری کردیا ہے ۔
آئی سی سی کی جانب سے جاری کردہ پروموشنل ویڈیو میں پاکستان کے لیجنڈری کرکٹر وسیم اکرم کو نمایاں دکھایا گیا ہے جو ایونٹ کیلئے وائٹ کوٹ کی اہمیت کو اُجاگر کرتے نظر آرہے ہیں۔
میگا ایونٹ سے قبل آئی سی سی کی جانب سے جاری کردہ اِس پرومو میں وائٹ کوٹ کو عظمت کی علامت قرار دیا گیا ہے۔ویڈیو میں وسیم اکرم کو کہتے سُنا جاسکتا ہے کہ چیمپئنز ٹرافی میں سب سے مضبوط ٹیم ہی ٹورنامنٹ جیتتی نظر آئے گی۔
واضح رہے کہ منی ورلڈکپ کے نام سے مشہور آئی سی سی چیمپئنز ٹرافی 2025 کا آغاز 19 فروری سے پاکستان میں ہو رہا ہے۔
آئی سی سی ون ڈے ورلڈکپ 1996 اور 2008 کے ایشیا کپ کے بعد پاکستان کو ایک عرصے بعد پہلی بار چیمپئنز ٹرافی 2025 کی صورت میں آئی سی سی کے کسی بڑے ایونٹ کی میزبانی ملی ہے
بھارت کی جانب سے ٹیم پاکستان بھیجنے سے انکار کے بعد پاکستان نے آئی سی سی کے ساتھ ایک معاہدے کے تحت ہائبرڈ ماڈل پر رضامندی ظاہر کی تھی، جس کے تحت پاکستان اور بھارت کے درمیان 2027 تک تمام انٹرنیشنل ایونٹ نیوٹرل وینیو پر ہوں گے، لہذا چیمپئنز ٹرافی 2025 کے لیے بھارت کے تمام میچز متحدہ عرب امارات میں کھیلے جائیں گے۔
