وفاقی وزیر مواصلات عبدالعلیم خان نے کراچی، سکھر موٹروے کا کام جلد شروع کرنے کا اعلان کر دیا۔
کئی سال سے زیر التوا کراچی سے سکھر موٹروے کی اسی سال 2025 میں تعمیر کے آغاز کا فیصلہ کر لیا گیا ہے اور اس حوالے سے وفاقی وزیر مواصلات عبدالعلیم خان کی زیر صدارت ہونے والے خصوصی اجلاس میں موٹروے کی تعمیر شروع کرنے کی ہدایت کردی گئی ہے۔
اجلاس سے خطاب کرتے ہوئے وفاقی وزیر مواصلات عبدالعلیم خان کا کہنا تھا کہ سندھ حکومت کو بھی اس موٹروے کی تعمیر میں شامل ہونے کی دعوت دیں گے اور اس موٹروے کا آغاز کراچی پورٹ سے ہوگا جبکہ اس کو سکھر موٹروے سے منسلک کیا جائے گا۔
وفاقی وزیر مواصلات کا کہنا تھا کہ کراچی سے سکھر موٹروے کی تعمیر کے بعد ملک میں نارتھ،ساؤتھ موٹروے کا نیٹ ورک مکمل ہو جائے گا، ملکی ترقی بالخصوصی تجارتی مال کے نقل و حمل میں یہ موٹروے سنگ میل ثابت ہوگی۔
عبدالعلیم خان کا کہنا تھا کہ کراچی سکھر موٹروے پراجیکٹ کو پبلک پرائیویٹ پارٹنر شپ کے طور پر شروع کیا جا سکتا ہے اور اگر پبلک پرائیویٹ پارٹنر شپ میسر نہ ہوئی تو حکومت خود اس موٹروے کا خرچہ اٹھائے گی، اگلے 25 سال میں یہ موٹروے حکومت کو 3000 ارب روپے منافع کے طور پر دے گی۔
ان کا مزید کہنا تھا کہ کراچی سکھر موٹروے کا کام انشاء اللہ 2025میں جلد از جلد شروع کریں گے۔
