اسلام کی خاطر بالی ووڈ کو خیرباد کہنے والی بھارتی اداکارہ ثناء خان کے ہاں دوسرے بیٹے کی پیدائش ہوگئی، انہوں نے مداحوں کو انسٹا گرام کے ذریعے خوشخبری سنائی۔
ثناء خان نے فوٹو اینڈ ویڈیو شیئرنگ ایپ انسٹاگرام پر ایک اینیمیٹڈ ویڈیو شیئر کی ہے۔ جس کے کیپشن میں لکھا ہے کہ اللّٰہ سے دعا ہے کہ وہ ہمیں اس کی اچھی پرورش کرنے کی توفیق دے تاکہ یہ اللّٰہ کا تابع دار بندہ بنے۔
ویڈیو میں لکھا ہے کہ ہم یہ اطلاع دیتے ہوئے بہت خوش ہیں کہ ہمارے ہاں 5 جنوری 2025ء یعنی 5 رجب 1446 ہجری کو ایک ننھے شہزادے کی پیدائش ہوئی ہے اور طارق جمیل نے اپنے چھوٹے بھائی کا بہت پُرجوش انداز میں استقبال کیا ہے۔
اینیمیٹِڈ ویڈیو کے ساتھ ثناء خان نے مزید لکھا ہے کہ ہر چیز جو اللّٰہ نے ہمیں عطاء کی اس پر شکر گزار ہیں، اللّٰہ ہمیں ہر چیز صحیح وقت آنے پر عطاء کرتا ہے اور جب عطاء کرتا ہے تو جھولیاں خوشیوں سے بھر دیتا ہے۔
View this post on Instagram
ثناء خان کو دوسرے بیٹے کی پیدائش پر سوشل میڈیا صارفین و مداحوں کی جانب سے مبارک باد کے پیغامات بھی مل رہے ہیں، ساتھ ہی بیٹے کا نام بھی تجویز کیا جارہا ہے۔
ایک صارف نے لکھا ہے کہ سابقہ اداکارہ اپنے اس بیٹے کا نام مفتی مینک رکھیں گی جبکہ دوسرے صارف نے تجویز دی کہ اس بچے کے بڑے بھائی کا نام طارق جمیل ہے تو اب چھوٹے کا نام طارق مسعود رکھ لیں۔
کچھ صارفین نے پوسٹ کے کمنٹ سیکشن میں لکھا کہ ہمیں اب بے صبری سے اس بچے کا نام رکھنے جانے کا انتظار رہے گا۔
