پاکستان تحریک انصاف کے رہنما اور ممبر قومی اسمبلی ( ایم این اے ) شیر افضل مروت نے دوسری شادی نہ کرنے کی وجہ بتادی۔
پی ٹی آئی رہنما شیر افضل مروت نے حال ہی میں سماء ٹی وی کے پروگرام ‘ گپ شب ‘ میں شرکت کی جہاں انہوں نے دلچسپ سوالات کے جوابات دیے۔
دوسری شادی سے متعلق کیے گئے سوال کے جواب میں شیر افضل مروت کا کہنا تھا کہ ’ اس حوالے سے دیئے گئے میرے بیان پر مذہبی حلقوں نے تنقید کی تھی، اللہ تعالیٰ نے ایک سے زائد شادیوں پر شرط رکھی ہے کہ اگر آپ انصاف کرسکتے ہیں تو شادی کرلیں‘۔
انہوں نے کہا کہ ’ ہمارا عقیدہ ہے کہ ہمیں زندگی ایک بار ملنی ہے اور اگر ایک بار ملنے والی زندگی میں ہی آپ اپنی بیوی کی سوتن لے آئے تو اس کی زندگی میں کیا رہ جائے گا اور اللہ نے جب آپ کی قسمت آپ کی اہلیہ کے ساتھ ملا دی ہے تو میرا خیال ہے کہ آپ کو اس کے لئے ہر قسم کی قربانی اٹھانی چاہیے‘۔
View this post on Instagram
اپنی بات جاری رکھتے ہوئے شیر افضل مروت نے دلچسپ قصہ سنایا کہ ’ میرے چچا نے پانچ شادیاں کی تھیں اور میں ان کو دیکھتا آیا کہ وہ جو تازہ شادی کرتے تھے پھر اسی بیگم کے ہوجاتے تھے اور پہلے والی بیگم سے ان کا پیار کم ہوجاتا تھا ‘۔
ان کا کہنا تھا کہ ’ اللہ تعالیٰ نے آپ کو جو شریک حیات دی ہے اس کا مطلب یہی ہے کہ وہ آپ کی زندگی کی ایک بنیادی اکائی ہے اور میں ایک فیملی کورٹ جج رہا ہوں اس دوران میں نے بہت سارے گھروں کو ٹوٹتے دیکھا ہے ، اپنی اہلیہ کو عزت دینی چاہیے اور سب سے بڑی اس کے جذبات کو مجروح نہیں کرنا چاہیے‘۔
انہوں نے مزید کہا کہ ’ جب آپ اپنی اہلیہ کی محبت کو شیئر کرتے ہیں تو یہ بات ’ بندے کو مار دینے ‘ کے مترادف ہے ‘۔
