ہزہ انسٹی ٹیوٹ آف ٹیکنالوجی، جاپان پاکستان انوویشن انسٹیٹیوٹ اور پنجاب سکلز ڈویلپمنٹ فنڈ (پی ایس ڈی ایف) مشترکہ طور پر پنجاب میں جدید ترین جاپانی زبان اور ثقافتی تربیتی مراکزقائم کریں گے جو کہ پاکستانی نوجوانوں کے لیے جاپان میں عالمی نوعیت کے کام کے مواقع فراہم کرے گا۔
وزیراعلیٰ پنجاب مریم نواز کی ہدایات کے مطابق دونوں اداروں نے وزیراعلی پنجاب ٹاسک فورس برائے سکلز ڈوپلمنٹ عدنان افضل چٹھہ کی نگرانی میں ایک مشترکہ معاہدہ پر دستخط کیے ہیں جس کی رو سے پنجاب میں جاپانی زبان سیکھانے والے چھ ادارے قائم کیے جائیں گے جہاں دو ہزار سے زائد پنجاب کے نوجوانوں کو جاپانی زبان، ثقافت اور پیشہ ورانہ معیارات کے مطابق تربیت فراہم کی جائے گی۔
یہ پروگرام وزیر اعلیٰ پنجاب کے نوجوانوں کو بین الاقوامی سطح پر مسابقتی مہارتوں سے آراستہ کر کے انہیں بااختیار بنانے کے عزم سے ہم آہنگ ہے۔ اس کا مقصد انفارمیشن ٹیکنالوجی، نقل و حمل، بزرگوں کی نگہداشت، مہمان نوازی اور زراعت سمیت بیرون ملک اعلیٰ مانگ والے شعبوں میں روزگار کے لیے راستے پیدا کرنا ہے۔
اسکے علاوہ جاپان پاکستان انوویشن انسٹیٹیوٹ کی شراکت داری میں، تربیت یافتہ افراد کو جاپان میں ملازمت کی ضمانت فراہم کی جائے گی۔ یہ تعاون پاکستان اور جاپان کے درمیان دو طرفہ تعاون اور ثقافتی تبادلے میں اضافہ میں کلیدی کردار ادا کرے گا۔
جاپان پاکستان انوویشن انسٹیٹیوٹ کے چیئرمین مسٹر مٹسورو کیوچی کے مطابق اس شراکت داری سے جاپان میں ہنرمند کارکنوں کی بڑھتی ہوئی مانگ کو پنجاب کے غیر معمولی صلاحیتوں کے حامل ہنرمندوں سے پورا کرنے میں ایک پل کا کردار ادا کرے گا۔ اس طرح کی مشترکہ کاوش پاکستانیوں اور جاپانیوں کے لیے ایسے مواقع پیدا کریں گے جودونوں ممالک کی اقتصادی ترقی اور ثقافتی تبادلے کو فروغ دیں گے،اور دونوں قوموں کے درمیان تعلقات کو مزیدمضبوط کریں گی۔
پی ایس ڈی ایف کے چیف ایگزیکٹوآفیسراحمدخان کے مطابق یہ شراکت داری پنجاب کے نوجوانوں کے لیے عالمی دروازے کھولنے کے ساتھ انکو معاشی خودمختاری اور صوبے میں سماجی و اقتصادی ترقی کو آگے بڑھائیں گی۔ یہ شراکت داری جاپانی صنعتی مہارت کو پنجاب میں متعارف کروائے گی۔
وزیراعلی پنجاب ٹاسک فورس برائے سکلز ڈوپلمنٹ عدنان افضل چٹھہ نے اس شراکت داری پر اظہار کرتے ہوئے کہا کے یہ شراکت داری پنجاب میں بے روزگاری سے نمٹنے اور عالمی سطح پر مسابقتی افرادی قوت پیدا کرنے کے لیے ایک اہم سنگ میل ہے۔ یہ پنجاب حکومت کے نوجوانوں کو بااختیار بنانے کے لیے مواقعوں کی فراہمی کے عزم کی عکاسی کرتا ہے تاکہ ان کی زندگیوں میں واضح تبدیلی لائی جا سکے اور صوبے کی ترقی میں انکا شامل کیا جائے۔
