وزیراعلیٰ پنجاب مریم نواز کے دورہ چین کے موقع پر ہواوے کے تعاون سے لاہور کو پاکستان کا پہلا جدید ترین اسمارٹ سٹی بنانے کا فیصلہ کیا گیا ہے۔
وزیراعلیٰ پنجاب مریم نواز شنگھائی کے ڈسٹرکٹ لونگ گانگ میں ہواوے ٹیکنالوجیز پہنچی جہاں انکا پرتپاک استقبال کیا گیا۔ وزیراعلیٰ نے ہواوے کو پاکستان بالخصوص پنجاب میں سرمایہ کاری کی دعوت دے اورنواز شریف آئی ٹی سٹی میں آفس قائم کرنے پر تعاون کی پیشکش بھی کی۔
مریم نواز نے ہواوے کو پنجاب میں اسمبلنگ اور مینوفیکچرنگ پلانٹ لگانے پر بھرپور تعاون کی یقین بھی دہانی کروائی جبکہ صوبے بھر میں ہواوے کو پنجاب ریٹیل آفس اور آفٹر سیل سروس سینٹر قائم کرنے کی بھی پیشکش کی۔
وزیراعلیٰ پنجاب کی ہواوے گورنمنٹ افیئرز کے صد وانگ چینگ ڈونگ سے ملاقات ہوئی جس میں لاہور کو ماڈرن ڈیجیٹل سٹی بنانے کے لیے مختلف تجاویز اور سفارشات پر گفتگو ہوئی ملاقات میں ای کامرس، ایکو سسٹم پروڈکشن، ہیلتھ اور ایجوکیشن ڈیپارٹمنٹ کی ڈیجیٹلائزیشن سے متعلق پر امور پر تبادلہ خیال کیا گیا۔
ہواوے کے صدر مسٹر وانگ چینگ ڈونگ نے وزیر اعلیٰ اور وفد کو تفصیلی بریفنگ دی جبکہ ہواوے کے پاکستان میں بالخصوص پنجاب میں جاری پراجیکٹس سے متعلق تفصیلات بیان کیں۔
مریم نواز شریف نے کہا کہ ڈیجیٹل پنجاب کے ویژن کو ہواوے کے اشتراک کار سے عملی شکل دیں گے، ٹیلی کمیونیکیشن اور الیکٹرانک اور ڈیجیٹلائزیشن کے امور میں ہواوے کی مہارتوں سے مستفید ہونا چاہتے ہیں۔ پنجاب کی پہلی مکمل اے آئی یونیورسٹی میں ہواوے کے پروفیشنل اسکل سے مستفید ہونا چاہیں گے۔
وزیراعلیٰ پنجاب نے کہا کہ ہواوے نوازشریف آئی ٹی سٹی میں کیپسٹی بلڈنگ اور آئی ٹی ریسرچ میں معاونت کریں، ہواوے کے تعاون سے پنجاب کے نوجوانوں کو ڈیجیٹل ٹیکنالوجیز کی جدت سے متعارف کروانے چاہتے ہیں۔
ہواوے ایکو سسٹم ڈویلپمنٹ میں پنجاب کی معاونت کرے، لاہور میں پہلا سیف سٹی پراجیکٹ ہواوے کے اشتراک سے قائم ہوا۔ وزیر اعلیٰ پنجاب نے ہواوے ٹیکنالوجیز کا دورہ کیا اور مختلف شعبے دیکھے جبکہ ہواوے حکام کے ساتھ فیکٹری کا بھی دورہ کیا۔
