آج دنیا بھر میں انسانی حقوق کا دن منایا جا رہا ہے مگر 77 سال گزرنے کے باوجود بھی بھارت انسانی حقوق کی کھلی خلاف ورزیوں میں سرفہرست ہے۔
بھارت میں جاری انسانی حقوق کی خلاف ورزیوں میں مذہبی انتہا پسندانہ پالیسیاں ، عورتوں اوراقلیتوں پر مظالم اور شہریت ترمیمی قانون سر فہرست ہیں، مودی سرکار کی جانب سے اقلیتوں کے حقوق نہ صرف سلب بلکہ انسانیت سوز سلوک بھی کیا جاتا ہے۔
سنہ 1948 سے اب تک مظلوم کشمیری ظلم و ستم کی چکی میں پس رہے ہیں، 5 اگست 2019 کو ہندوستان نے آرٹیکل 370 کی تنسیخ سے مقبوضہ کشمیر کی خصوصی حیثیت منسوخ کر دی۔ اگست 2019 کے بعد سے ایک ہزار سے زائد کشمیری شہیدجبکہ 25ہزار سے زائد کو گرفتار کیا گیا۔
کشمیر میڈیا سروس کے مطابق اس عرصے کے دوران ڈیڑھ سو سے زائد خواتین زیادتی کا شکار جبکہ 200 بچے یتیم ہو گئے، آرٹیکل 370 کی تنسیخ کے بعد سے اب تک 1200 سے زائد املاک کو نذرِ آتش کیا جا چکا ہے
ہندوستان میں مسلمانوں، عیسائیوں اور نچلی ذات کے ہندوؤں پر زمین تنگ ہے، بھارت میں پچھلی دو دہائیوں سے اب تک بھارت میں تقریباً 500 سے زائد مساجد اور مزارات کو شہید کیا جا چکا ہے، 6 دسمبر 1992 کو اتر پردیش کے شہر ایودھیا میں انتہا پسند ہندوؤں نے بابری مسجد کو شہید کر دیا تھا۔ 2023 میں بھارت کی 23 ریاستوں میں عیسائیوں کے خلاف 400 تشدد کے واقعات رپورٹ ہوئے۔
اگست 2008 کو ہندو انتہا پسندوں نے بی جے پی کے زیرِ حکومت ریاست اڑیسہ کے ضلع کندھمال میں سینکڑوں عیسائیوں کو موت کے گھاٹ اتار دیا تھا، چار دن تک جاری رہنے والے فسادات میں 600 عیسائی گاؤں اور 400 سے زائد چرچ نذرِ آتش کر ڈالے گئے۔ صرف جنوری تا جون 2022 میں عیسائیوں کے خلاف 274 پرتشدد واقعات پیش آئے۔
نیشنل کرائم ریکارڈ بیورو کے مطابق گزشتہ 5 برسوں میں نچلی ذات کے ہندووں کیخلاف ڈھائی لاکھ سے زائد نفرت انگیز جرائم رپورٹ ہوئے، صرف 2021 میں دلت ہندوؤں کے خلاف 60 ہزار سے زائد جرائم رپورٹ ہوئے۔ اوسطاً ہر 10 منٹ میں ایک دلت کے خلاف تشدد کا واقعہ پیش آتا ہے۔
عالمی میڈیا کے مطابق 2021 میں میں خواتین کے ساتھ زیادتی کے 4 لاکھ سے زائد مقدمات درج کئے گئے، بھارت میں صحافت کا گلہ گھونٹنے کے لئے انسدادِ دہشتگردی کے قوانین کا استعمال تشویشناک حد تک بڑھ چکا ہے۔
سن 2020 میں ایمنسٹی انٹرنیشنل نے حکومتی جابرانہ ہتھکنڈوں سے تنگ آکر بھارت میں اپنا دفتر بند کر دیا تھا،2022 میں آکسفیم اور 2023 میں مودی کے خلاف ڈاکومنٹری نشر کرنے پر بی بی سی انڈیا کے دفاتر پر بھی 4 روز تک چھاپے مارے گئے۔
مودی سرکار کے اقتدار میں آنے سے بھارت کا "انسانی حقوق" کا ریکارڈ بد سے بدتر ہوتا جا رہا ہے، عالمی برادری بھارت میں جاری انسانی حقوق کی سنگیں خلاف ورزیوں کا نوٹس لے۔
