وفاقی وزیر داخلہ محسن نقوی سے ورلڈ بینک کے کنٹری ڈائریکٹر ناجے بن حسین نے ملاقات کی۔ ملاقات میں اسموگ کے مسئلے پر باہمی تعاون سے قابو پانے اور مشترکہ حکمت عملی تیار کرنے پر اتفاق کیا گیا۔
وفاقی وزیرداخلہ اور ورلڈ بینک کے کنٹری ڈائریکٹر کی ملاقات میں اس بات پر اتفاق کیا گیا کہ ورلڈ بینک اور سی ڈی اے کی مشترکہ ٹیم انسداد اسموگ کے لیے جامع پلان تیار کرے گی۔ اس دوران پائیدار ترقی کے اہداف، الیکٹرک بسوں کی تعداد میں اضافہ، صاف پانی، سینیٹیشن، اور کچی آبادیوں کی ترقی جیسے اہم امور پر بھی گفتگو ہوئی۔
وفاقی وزیر داخلہ محسن نقوی نے بتایا کہ رواں برس اسلام آباد کا ایئر کوالٹی انڈیکس دوسواکہتر تک جا پہنچا، جو ایک خطرناک حد ہے۔ انہوں نے اس بات پر زور دیا کہ فوری طور پر ایک جامع انسداد اسموگ پلان بنانا ضروری ہے۔
محسن نقوی نے کہا کہ اسلام آباد دنیا کے خوبصورت ترین دارالحکومتوں میں شامل ہے اور شہر کی بہتر ایئر کوالٹی کے لیے ورلڈ بینک کے تعاون کا خیرمقدم کیا جائے گا۔ انہوں نے یہ بھی کہا کہ اسموگ کی اصل وجوہات کی نشاندہی اور ان کے تدارک کے لیے فوری اقدامات کیے جا رہے ہیں۔
ورلڈ بینک کے اشتراک سے فضائی آلودگی پر قابو پانے کے لیے انسداد اسموگ مشینوں کی تنصیب کا بھی جائزہ لیا جا رہا ہے۔ انہوں نے شہریوں کو صاف پانی اور بہتر سینیٹیشن فراہم کرنے کے ساتھ ساتھ اسلام آباد میں الیکٹرک بسوں کی تعداد بڑھانے پر زور دیا۔
