لاہور ہائیکورٹ نے چھبیس ویں آئینی ترمیم کو کالعدم قرار دینے کی درخواست پر سماعت غیر معینہ مدت تک ملتوی کردی۔ چیف جسٹس نے ریمارکس دیے کہ اس نوعیت کی درخواست سپریم کورٹ میں دائر ہوچکی ہے۔
چیف جسٹس مس عالیہ نیلم نے شہری نذیر احمد چوہدری کی درخواست پر سماعت کی۔ درخواست میں موقف اختیار کیا گیا ہے کہ چھبیس ویں ترمیم آئین پاکستان کے دیباچہ کے خلاف ہے۔ سنیارٹی کا اصول نظر انداز کر کے عدلیہ کی آزادی پر قدغن لگائی گئی۔
درخواست کے متن کے مطابق جوڈیشل کمیشن میں ممبران اسمبلی اور وزراء کی شمولیت عدلیہ کی خودمختاری پر وار ہے۔ درخواست میں استدعا کی گئی ہے کہ عدالت چھبیس ویں آئینی ترمیم کو کالعدم قرار دے۔
چیف جسٹس نے ریمارکس دیے کہ چھبیس ویں آئینی ترمیم کے خلاف درخواست سپریم کورٹ میں دائر ہوچکی ہے۔ عدالت نے سماعت غیر معینہ مدت تک ملتوی کر دی۔
