پاکستان شوبز انڈسٹری کی معروف اداکارہ سونیا حسین نے لکس ایوارڈز 2023 کی تقریب میں شرکت نہ کرنے کی وجہ بتادی۔
یاد رہے کہ 6 اکتوبر کو کراچی میں لکس اسٹائل ایوارڈ 2023 کی تقریب منعقد ہوئی تھی جس میں پاکستانی شوبز انڈسٹری کے اداکاروں اور انڈسٹری سے وابستہ دیگر شخصیات نے شرکت کی۔
رپورٹس کے مطابق متعدد اداکاروں کی جانب سے تقریب میں ایوارڈز کی غیر منصفانہ تقسیم پر تنقید بھی کی گئی ہے۔
اداکارہ سونیا حسین نے تقریب میں شرکت نہیں کی اور اس حوالے سے انہوں نے نجی ٹی وی کے ایک پروگرام میں گفتگو کرتے ہوئے بتایا کہ میں ایسی تقریبات میں شرکت نہیں کرتی۔
سونیا حسین کا کہنا تھا کہ مجھے نہیں معلوم کیوں لیکن میں ایوارڈز کی تقریب میں جانا پسند نہیں کرتی اور وہاں جانا بیکار بھی ہے۔
یاد رہے کہ 2021 میں سونیا حسین نے اپنے ڈرامہ سیریل ’ سراب ‘ کو ایوارڈ کے لئے نامزد نہ کرنے کے لکس اسٹائل ایوارڈ کے فیصلے پر مایوسی کا اظہار کیا تھا۔
اداکارہ کا کہنا تھا کہ یہ دیکھ کر بہت مایوسی ہوئی کہ سراب جیسے پروجکیٹ نے لکس اسٹائل ایوارڈ 2021 میں ایک نامزدگی حاصل نہیں کی۔
