سندھ حکومت نے اولمپکس میں پاکستان کیلئے 32 سال بعد پہلا گولڈ میڈل جیتنے پر قومی جیولین تھرور ارشد ندیم کیلئے 5 کروڑ روپے انعام کا اعلان کردیا۔
ترجمان سندھ حکومت اور میئر کراچی مرتضٰی وہاب نے کہا ہے کہ ارشد ندیم کے کھیل کو سراہتے ہوئے پاکستان کیلئے گولڈ میڈل جیتنے پر انہیں اور پوری قوم کو مبارکباد پیش کرتا ہوں۔
میئر کراچی کا کہنا تھا کہ تھرو پھینکنے کے معاملے میں پہلے پوزیشن بھی ارشد ندیم کی ہے جبکہ دوسرا بڑا تھرو بھی انہوں نے ہی پھینکا ہے، اس شاندار کارکردگی کا مظاہرہ کرنے پر انہیں مبارکباد پیش کرتے ہیں۔
مرتضیٰ وہاب کا مزید کہنا تھا کہ 40 سال بعد اولمپکس میں پاکستان کیلئے پہلا گولڈ میڈل جیتنے پر سندھ حکومت کی جانب سے انہیں 5 کروڑ روپے انعام کا اعلان کرتے ہیں۔
یاد رہے کہ فرانس میں جاری پیرس اولمپکس 2024 میں پاکستان کے اتھلیٹ اور قومی ہیرو ارشد ندیم نے پاکستان کو جیولین تھرو کے مقابلے میں گولڈ میڈل دلواتے ہوئے اولمپکس کی 118 سالہ تاریخ بدل دی ہے۔
واضح رہے کہ ارشد ندیم انفرادی مقابلوں میں پاکستان کو گولڈ میڈل دلوانے والے پہلے ایتھلیٹ ہیں جبکہ اولمپکس میں گولڈ میڈل جیتنے والے دوسرے جنوبی ایشین ایتھلیٹ ہیں۔
1984 اولمپکس کے بعد اور ہاکی کے علاوہ پاکستان کا یہ پہلا گولڈ میڈل ہے جبکہ اولمپکس کی تاریخ میں پاکستان کا 11 واں میڈل ہے۔
